Ի փառավորումն և ի նշանավորումն քրիստոնեության մեծագույն և նշանակալի տոնի, սրտանց շնորհավորում եմ հայ ժողովրդին:

 

Քրիստոսի հրաշափառ Հարությունը դարձավ մեր հավատի հիմքը, նոր կյանքի ճանապարհ՝ պայծառացած կենարար լույսով, մարդկությանը պարգևեց մահին հաղթելու և հավիտենական կյանքը ժառանգելու երկնային շնորհը։

 

Հայ ազգը դարեր շարունակ այդ հավատի շնորհիվ է ապրել ու հարատևել՝ անցնելով բազմաթիվ փորձությունների,պատերազմների ու դժվարությունների միջով։

Քրիստոսի հարությունն ապրում է յուրաքանչյուր հավատացյալ հայի սրտում իր խղճի և հավատքի հետ միասին:

 

Այդ հավատն է ապրելու և պայքարելու ուժ տալիս նաև այսօր, երբ կորսված է Արցախի զգալի մասը, երբ ունենք սահմանային անվտանգության լրջագույն հարցեր:

 

Զորացած Սուրբ Զատկի բերկրալի տոնի խորհուրդով և մեծ Ավետիսով՝ այսօր առավել, քան երբևէ անհրաժեշտություն ունենք համախմբվածությամբ, հավատով և մեծ նվիրումով լծվելու մեր Հայրենիքի վերականգնման և զորացման գործին:

 

Սիրելի՛ հայրենակիցներ մեկտեղենք մեր ուժերը Հայաստանում, Արցախում և Սփյուռքում, որպեսզի կարողանանք ոտքի կանգնել, ամոքել ցավերն ու բուժել վերքերը, ապացուցենք, որ մենք կարող ենք ապաքինվել անգամ ամենածանր հարվածներից և կրկին բռնել հաղթանակի ճանապարհը:

Աստված պահապան բոլորիս։

Քրիստոս հարյավ ի մեռելոց։

Օրհնյալ է Հարությունը Քրիստոսի։