Մեկ տարի Նիկոլ Փաշինյանի՝ բուհերի շենքերը վաճառելու և ակադեմիական քաղաք կառուցելու վերաբերյալ արված հայտարարությունը ծաղրած անձը Երևանի Պետական համալսարանում երեկ պաշտոն է ստացել։ Խոսքը՝ Միքայել Հովհաննիսյանի մասին է։ Նա ԵՊՀ զարգացման և նորարարությունների գծով պրոռեկտոր է նշանակվել։ Այս մասին հայտնել են համալսարանի լրատվականից։

Բուհերի շենքերը վաճառելու և ակադեմիական քաղաք կառուցելու վերաբերյալ հայարարություն Նիկոլ Փաշինյանն արել էր 2021 թվականի մարտի 28-ին։

Երևանյան բուհերի շենքերը վաճառելու գաղափարն, ըստ վարչապետ Նիկոլ Փաշինյանի, պայմանավորված է դրանց ֆիզիկական ենթակառուցվածքային ու բովանդակային խնդիրներով:

«Քանի որ շենքերը գտնվում են կենտրոնում, այդ շենքերը հանենք վաճառքի, ձևավորված գումարներից Երևանից դուրս կառուցենք քաղաք, որը կլինի բուհական-ակադեմիական քաղաք, որտեղ կենտրոնացած կլինի մեր գիտական, դասախոսական պոտենցիալը, և այս երեխաները այդ բարեփոխված դպրոցից հնարավորություն ունենան գնալ բարեփոխված բուհական համակարգ: Այսօր մեր բուհերում նույնիսկ շենքային պայմաններն ադեն չեն համապատասխանում 21-րդ դարի չափանիշներին», - նշել էր վարչապետը:

Հայտարարությունից երկու օր անց՝ մարտի 30-ին,  Միքայել Հովհաննիսյանը ֆեյսբուքյան իր էջում հումորային տեսանյութ է հրապարակում։

Մեկ տարի անց Հովհաննիսյանը պաշտոն է ստանում։ Հետաքրքիր է ԵՊՀ պրոռեկտորը շարունակում է նույն կարծիքին մնալ, թե այնուամենայնիվ հասցրել է փոխել իր դիրքորոշումը, և արդյո՞ք նույն կերպ կարձագանքի արդեն պրոռեկտոր Հովհաննիսյանը, երբ Նիկոլ Փաշինյանը որոշի ԵՊՀ-ի շենքը ևս վաճառքի հանել։

Նշենք, որ Միքայել Հովհաննիսյանը միակը չէ, որ ծաղրել է Նիկոլ Փաշինյանի այս կամ այն հայտարարությունն ու գործողությունը, բայց պաշտոն ստացել։ Ժամանակին այդպիսի դրվագով  է հիշվել նաև Գրիգորի Մինասյանը, ով արդեն Արդարադատության փոխնախարարն է։ ԼՀԿ ղեկավար Էդմոն Մարուքյանն էլ Նիկոլ Փաշինյանի խիստ քննադատներից էր, հիմա՝ նրա հատուկ հանձնարարականներով դեսպանը։ Այս շարքը բավականին լայն է։

Irakanum.am