ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական երրորդ բաժնում ձեռնարկվում են անհրաժեշտ միջոցառումներ՝ խորտկարանում տեղի ունեցած դանակահարության դեպքը բացահայտելու ուղղությամբ:
Քննչական կոմիտեից NEWS.am-ը տեղեկացավ, որ 2022թ. մարտի 26-ին՝ ժամը 21։28-ին, բժշկական կենտրոնից ահազանգ է ստացվել այն մասին, որ Վարդանանց փողոցից, «պարանոցի կտրած-ծակած վերք» ախտորոշմամբ, իրենց մոտ բուժօգնության է տեղափոխվել 62-ամյա տղամարդ։
Իրականացված անհետաձգելի միջոցառումների արդյունքում տվյալներ են ձեռք բերվել այն մասին, որ տղամարդը կյանքին վտանգ սպառնացող նշված վնասվածքն ստացել է 2022թ. մարտի 26-ին՝ ժամը 20։30-ի սահմաններում, Երեւան քաղաքի Վարդանանց փողոցում գործող խորտկարանում տեղի ունեցած վիճաբանության ժամանակ, որի ընթացքում ենթադրյալ հանցագործություն կատարած անձը դանակով հարվածել է վերջինիս պարանոցի հատվածին եւ դիմել փախուստի։
Դեպքի առթիվ հարուցվել է քրեկան գործ՝ ՀՀ քրեկան օրենսգրքի 112-րդ հոդվածի 2-րդ մասի 9-րդ կետով։ Տղամարդը ճանաչվել է տուժող եւ հարցաքննվել դեպքի հանգամանքների շուրջ։
Քրեական գործի նախաքննության ընթացքում կատարվել է դեպքի վայրի զննություն, որի արդյունքում հայտնաբերվել են ապացուցողական նշանակություն ունեցող դանակի նմանվող սուր կտրող-ծակող առարկա՝ արնանման հետքերով, այլ կարեւոր իրեր եւ առարկաներ, վերցվել են փորձանմուշներ, առգրավվել են տղամարդու հագին դեպքի պահին եղած հագուստները, հարցաքննվել են մի շարք անձինք, կատարվել է լուսանկարով անձի ճանաչման ներկայացնելու քննչական գործողություն: Տուժողի մարմնական վնասվածքի բնույթը, ծանրության աստիճանը, առաջացման մեխանիզմը եւ մի շարք այլ հանգամանքներ պարզելու նպատակով նշանակվել են դատաբժշկական եւ դատակենսաբանական փորձաքննություններ:
Նախաքննությունը շարունակվում է: Ձեռնարկվում են միջոցառումներ՝ դեպքի բոլոր հանգամանքները, ցուցմունքներում մատնանշված հանգամանքները, ենթադրյալ հանցագործություն կատարած անձի ինքնությունը պարզելու, նրան հայտնաբերելու եւ վարույթն իրականացնող մարմնին ներկայացնելու ուղղությամբ:
Հանձնարարություններ են տրվել հետաքննության մարմնին:
