Արարատի մարզի Վեդի խոշորացված համայնքում անցկացվում է ավագանու ընտրություն՝ համամասնական ընտրակարգով, և Ուրցաձոր համայնքում կրկին առաջադրվել է համայնքապետ Ռաֆիկ Անդրեասյանը, ով 2016–ից համայնքի ղեկավարն էր, իշխանափոխությունից հետո հրաժարական տվեց և 2019–ին կրկին հաղթեց ընտրություններում։
Ինչ վերաբերում է Ուրցաձորում ընդդիմության վարկանիշին, Ռաֆիկ Անդրեասյանն ասաց․« Խմելու շորերը երրորդ անգամ պետք է հագնենք, դուք էլ հագեք, մի երգ ունեմ, կհրապարակեմ երրորդ անգամ»։
Հիշեցնենք, որ Ուրցաձորում ՔՊ-ի պարտությունից հետո գյուղապետը հրապարակել էր Միխայիլ Գալուստյանի հայտնի երգը:
Ընտրություններին մասնակցում են «Իմ Հզոր Համայնք» և «Քաղաքացիական Պայմանագիր» կուսակցությունները։ Առաջինի ցուցակը գլխավորում է Սպարտակ Թարթիկյանը, որը Սիսավան համայնքի նախկին ղեկավարն է, երկրորդի ընտրացուցակը՝ Վեդի համայնքի ղեկավարի պաշտոնակատար նշանակված Գարիկ Սարգսյանը, որը Արարատի նախկին մարզպետն էր։ Ընտրությունն անցկացնելու համար կազմավորվել են 28 ընտրական տեղամասեր համայնքի 19 բնակավայրերում:
