Ճանապարհային երթեւեկության կանոնների պահպանման մոնիտորինգի տեխնիկական միջոցները եւ պարեկային ծառայության ներդրումն օգնել են նվազեցնել վթարների թիվը Երեւանում։ Այս մասին մարտի 18-ին լրագրողների հետ հանդիպման ժամանակ ասաց ՀՀ փոխոստիկանապետ Արա Ֆիդանյանը։
Նրա խոսքով՝ նախկինում մայրաքաղաքին բաժին էր ընկնում վթարների ընդհանուր թվի 60-70 տոկոսը, այժմ՝ 50 տոկոսից էլ քիչ։
«Պատճառն այն է, որ տեսախցիկներ, արագաչափեր են տեղադրվել, պարեկային ծառայություն է ներդրվել։ Դա ճանապարհատրանսպորտային պատահարների, զոհերի ու վիրավորների կրճատման է հանգեցրել»,- ասաց փոխոստիկանապետը։ Այս եւ անցած տարվա երկու ամիսների վիճակագրության համեմատությունը ցույց է տալիս, որ պատահարների թիվը նվազել է ավելի քան 70-ով, զոհվել է 4 մարդ, վիրավորվել՝ 113։
