Irakanum.am-ն արդեն տեղեկացրել էր, որ Երեւանի քաղաքապետարանի դիմաց այսօր տեղի էր ունեցել բողոքի ակցիա, որով պահանջում էին քաղաքապետ Տարոն Մարգարյանի հրաժարականը: Նախաձեռնող խմբի տարածած հաղորդագրության մեջ նշվում է, որ պահանջում են Տարոն Մարգարյանի հրաժարականը և ավագանու արձակումը։ «Հավաքի ընթացքում ներկայացվեց հայտարարություն-պահանջ Տարոն Մարգարյանի հրաժարականի հիմնավորմամբ։ Ցույցի մասնակիցներին էին միացել ավագանու «Ելք» խմբակցության անդամները՝ Դավիթ Խաժակյանի գլխավորությամբ: Ցուցարարների ձեռքին կան պաստառներ հետեւյալ գրառումներով. «Քեզ տանելն անտանելի է Տարոն», «Տարոնի ավագանու դեմն առնենք», «Սերժը հեռացավ, փասա-փուսեն մոռացավ», «Հանրային տրանսպորտ, հանրային կառավարում», «քաղաքը Տարոն է մերժում»: Երեւանում՝ Տարոն Մարգարյանի կառավարման օրվանից սկսած խնդիրները ոչ միայն լուծում չեն ստանում, այլ ավելի են խորանում: Բացի այդ մեկ անգամ չէ, որ խոսվել է Մարգարյանի ահռելի ունեցվածք մասին, որը նա կուտակել է տարիների ընթացքում: Քաղաքաետարանի ճոխ ծախսերի մասին եւս մամուլում բազմաթիվ հրապարակումներ կան: Քաղաքային իշխանությունը մշտապես կտրված է եղել հանրությունից եւ որեւէ կերպ հաշվետու չի եղել նրա առաջ: Մարգարյան Տարոնը երբեք խորհրդարանում քաղաքի բյուջեի ծախսի մասին անձամբ հաշվետվություն չի ներկայացրել: Տարոն Մարգարյանը  հայտարարագրել է 250 միլիոն դրամ, 45 հազար դոլար, 50 հազար եվրո՝ միասին մոտ 600 հազար դոլար: Բացի այդ, նա հայտարարագրել է մեծ թվով անշարժ և շարժական գույք: Երեւանում՝ Թումանյան փողոցում, ունի բնակելի շենքի մի ամբողջ հարկ՝ 190.2 քմ մակերեսով, Ավանի Սայաթ-Նովա թաղամասում՝ 137.9 քմ բնակարան, Ավանի Բաբաջանյան փողոցում՝ 1578.3 քմ տարածք, առեւտրի կենտրոնի տարածք` 761.24ք/մ մակերեսով: Բացի այդ՝ Աճառյան փողոցում՝ 3729.8 ք/մ, իսկ Չարենցի թաղամասում՝ 44ք/մ շինություն, մեկ ամառանոց Ջերմուկում, երկու ավտոտնակ: Ի դեպ, 2013թ. Մարգարյանը հայտարարագրել էր ամառանոց Դիլիջանում, որը հետո վաճառել է: Նա վաճառել է նաեւ երկու մեքենա՝ «Ռենջ Ռովեր» եւ «Մերսեդես Բենց»: Հիմա Երեւանի քաղաքապետն ունի միայն «Մերսեդես S-450»: Իսկ քաղաքապետի կինը՝ Գոհար Սարգսյանն արդեն քանի տարի է` հայտարարագրում է 50 մլն դրամ ունեցվածք, եւ այդ թիվը մշտապես անփոփոխ է մնում: Սակայն հրապարակումների համաձայն  Երևանի  քաղաքապետն իրականում ունի շատ ավելի մեծ՝ չհայտարարագրված հարստություն: Մասնավորապես, Տարոն Մարգարյանին է պատկանում

1. Արմավիրում՝ 60 հա այգի
2. Մասիսում՝ 12 հա այգի և պահածոների գործարան
3. Երևանի Կրկեսի շենքը
4. Փամփուշտների գործարան՝ 50 տոկոս փայաբաժին
5. «Հանրապետական» մարզադաշտի մուտքի մոտ երկհարկանի շինանյութերի  հսկայական խանութ
6. Z տաքսի ծառայությունը
7. «Միլենա» տաքսի ծառայությունը
8. Ավան-Առինջում երկհարկանի սուպերմարկետի տարածք, որն այժմ տրված է  SAS-ին
9. Ավանի տարածքում 60 հատ խանութ-կրպակ
10. «Բունար» գովազդային գործակալությունը, որը Երևանում ունի մոտ 50    վահանակ ու պետական բյուջե որևէ հարկ չի մուծում
11. Մետրոյի կայարանների անցումներում՝ կրպակներ

Հասկանալի է, որ այս ահռելի հարստությունը երիտասարդ Տարոն Մարգարյանը իր անունով չի ձևակերպել: Բայց Հայաստանը փոքր երկիր է ու բոլորն ամեն ինչ գիտեն: Հայաստանում ստեղծվել է նոր իրավիճակ եւ գործող վարչապետ Նիկոլ Փաշինյանը  հեշտությամբ կարող է  ստեղծել հակակոռուպցիոն հանձնաժողով ու պարզել իրականությունը: Irakanum.am