Ուկրաինայի նախագահ Վլադիմիր Զելենսկիի մամուլի քարտուղար Յուլիա Մենդելը հայտարարել է, որ Կիևը հույս ունի շարունակել բանակցային գործընթացը Դոնբասի շուրջ՝ չնայած հակամարտության գոտում իրավիճակի սրմանը, գրում է svpressa.ru-ն: «Մենք հասկանում ենք, որ գնդակոծությունների թիվն ավելացել է: Ընդհանուր առմամբ, մենք հուսով ենք, որ դա ճգնաժամային ազդեցություն չի ունենա հրադադարի պահպանման համընդհանուր և համապարփակ ռեժիմի բանակցային գործընթացի վրա»,- ընդգծել է Մենդելը: Ավելի վաղ հաղորդվել էր, որ Ուկրաինայի նախագահի աշխատակազմի ղեկավար Անդրեյ Երմակը մերժել է ՌԴ նախագահի աշխատակազմի ղեկավարի տեղակալի Դմիտրի Կոզակի ուղարկած առաջարկները: Ինչպես ավելի վաղ հայտնել էր Tert.am-ը, օրերս Ինքնահռչակ Դոնեցկի Ժողովրդական Հանրապետության անվտանգության ենթախմբի ներկայացուցիչ Ալեքսեյ Նիկոնորովը հայտարարել էր շփման գծի ողջ երկայնքով իրավիճակի սրման մասին: «Մենք տեսնում ենք իրավիճակի սրում շփման գծի ողջ երկայնքով. Ուկրաինայի զորամիավորումները ավելի ու ավելի հաճախ են օգտագործում տարբեր տրամաչափի ականանետներ»,-ասել էր Նիկոնորովը: Նշենք՝ Դոնբասի շուրջ բանակցություններում անվտանգության հարցերի ենթախմբի հերթական հանդիպումը տեղի էր ունեցել մարտի 16-ին: Նիկոնորովը բացատրել է, որ հանդիպման ընթացքում հիմնական խնդիրները քննարկելու փոխարեն, ինչպիսիք են`սրման մակարդակի իջեցումը, խախտումների վերացումը, հրադադարի ռեժիմի ամրապնդման համար գործող միջոցառումների շրջանակներում համակարգման մեխանիզմի հստակեցման անհրաժեշտությունը, ինչպես նաև վերականգնման աշխատանքները, Կիևը «ընդհանուր սրման ֆոնին ոչ ակտուալ և անիմաստ քննարկումների և երկար մենախոսությունների մեջ է մտնում»: