Ցուցարարները արգելափակել են Բեյրութի խոշոր մայրուղիներում ելքերը և մուտքերը, հաղորդում է «ՌԻԱ Նովոստի»-ն: Առավոտյան ցուցարարները այրվող անվադողերով ու աղբամաններով սկսել են փակել Լիբանանի մայրաքաղաքի գլխավոր փողոցները: Միևնույն ժամանակ, ցուցարարների խմբերը շրջափակել են հյուսիս տանող գլխավոր մայրուղին: ԶԼՄ-ների հաղորդմամբ, նույն իրավիճակը նկատվում է Լիբանանի հյուսիսում գտնվող Բիբլոս և Բատրուն քաղաքներում: Լիբանանյան լրատվամիջոցները հայտնում են, որ երկրի հարավում ցուցարարները սկսել են արգելափակել նաև Բեյրութի և հարավային Լիբանանի միջև տրանսպորտային հաղորդակցությունը և Սաիդա-Տյուր ճանապարհի մի հատվածը: Արդեն մեկ շաբաթ է, ինչ ամբողջ Լիբանանում բողոքի ցույցեր են ընթանում: Ցուցարարները պահանջում են իշխանություններից «իրական գործողություններ նախաձեռնել» երկիրը տնտեսական ճգնաժամից դուրս բերելու և բնակչության կյանքը բարելավելու համար: Անկարգությունները սկսվել են այն բանից հետո, երբ լիբանանյան ֆունտը միայն վերջին օրերին արժեզրկվել է 15-17 տոկոսով: 2019-ի հոկտեմբերից բանկերում ավանդատուների արտարժութային հաշիվները մնացել են սառեցված, և այս ընթացքում շատ ապրանքների գներն աճել են ավելի քան 200 տոկոսով: Նշենք՝ 2019-ի աշնանից Լիբանանը գտնվում է խորը տնտեսական և քաղաքական ճգնաժամի մեջ: Այս ընթացքում երկու կառավարություններ հրաժարական են ներկայացրել՝ Սաադ Հարիրին՝ ցույցերի ֆոնին և Հասան Դիյաբը Բեյրութի նավահանգստում տեղի ունեցած պայթյունից հետո: