ՀՀ ԱԱԾ-ից ստացված օպերատիվ տեղեկությունների հիման վրա ՀՀ ոստիկանության Թումանյանի բաժնում նյութերի նախապատրաստման ընթացքում ձեռք են բերվել առերեւույթ փաստական տվյալներ այն մասին, որ Ալավերդի քաղաքի Կիրովի փողոցի շուրջ 90 մետր հատվածը ապօրինի հաշվառվել է որպես «Վալլեքս» խմբի ընկերություններին պատկանող տարածք եւ ներկայումս սեփականության իրավունքով պատկանում է «Վալլեքս Կապիտալ» ՓԲԸ-ին: Դատախազությունից հայտնում են, որ մասնավորապես, պարզվել է, որ Ալավերդի քաղաքից դեպի Մադան բնակավայր տանող Կիրովի փողոցը 2001թ. պետական գրանցում է ստացել որպես համայնքային սեփականություն եւ ՀՀ կառավարության համապատասխան որոշմամբ ընդգրկված է ՀՀ հողային օրենսգրքի 60-րդ հոդվածով նախատեսված՝ քաղաքացիներին եւ իրավաբանական անձանց սեփականության իրավունքով չփոխանցվող հողերի ցանկում: Մինչդեռ նման պայմաններում ՀՀ ԿԱ անշարժ գույքի կադաստրի պետական կոմիտեի իրավասու պաշտոնատար անձինք, առերեւույթ չարաշահելով իրենց պաշտոնեական լիազորությունները, գործով դեռեւս չպարզված ժամանակահատվածում, նշված փողոցի մի մասի նկատմամբ գրանցել են «Վալլեքս Կապիտալ» ՓԲ ընկերության իրավունքը, որի արդյունքում համայնքը զրկվել է իր գույքը տիրապետելու, օգտագործելու եւ տնօրինելու, իսկ համայնքի բնակիչները՝ փողոցով անարգել երթեւեկելու հնարավորությունից՝  նկատի ունենալով նաեւ, որ փողոցի այդ հատվածում տեղադրվել են ենթեւեկությունն անհնարին դարձնող մետաղական կոնստրուկցիաներ: Դրանով էական վնաս է պատճառվել համայնքի օրինական շահերին եւ իրավունքներին: Միաժամանակ, Ալավերդի համայնքի իրավասու պաշտոնատար անձինք, խախտելով ՀՀ հողային օրենսգրքի պահանջները, հաստատապես իմանալով այդ ամենի, փողոցի այդ հատվածում առանց թույլտվության մետաղական կոնստրուկցիաներ տեղադրվելու, ինչպես նաեւ համայնքապատկան հողամասերի` դրանց նպատակային ու գործառնական նշանակությանը համապատասխան չօգտագործելու հանգամանքների մասին, մինչեւ 2020թ. ընկած ժամանակահատվածում որեւէ միջոց չեն ձեռնարկել ճանապարհի հողամասի ինքնակամ զավթումը, դրանց վրա առանց թույլտվության տեղադրված շինությունների ինքնակամ կառուցումը կասեցնելու, հողամասն ինքնակամ զավթած, ինքնակամ կառույց իրականացրած  անձանց նկատմամբ վարչական պատասխանատվության միջոցներ կիրառելու ուղղությամբ: Լոռու մարզի դատախազության հանձնարարությամբ նշվածի փաստի առթիվ Ոստիկանության Թումանյանի բաժնում ՀՀ քրեական օրենսգրքի 308-րդ հոդվածի 2-րդ մասի եւ 3152-րդ հոդվածի հատկանիշներով հարուցվել է քրեական գործ եւ նախաքննություն կատարելու նպատակով ուղարկվել ՀՀ քննչական կոմիտեի Լոռու մարզային քննչական վարչություն: Նման իրողությունների պարզումը օրախնդիր են դարձնում համայնքներին պատկանող հողամասերի օտարման, վարձակալության եւ ենթավարձակալության հանձնելու հանգամանքների ուսումնասիրություննների իրականացումը: ՀՀ գլխավոր դատախազի կողմից տրված հանձնարարության հիման վրա պետական շահերի պաշտպանության գործառույթի շրջանակում Լոռու մարզի դատախազության կողմից արդեն իսկ սկսվել է մասշտաբային գործընթաց, որի արդյունքների մասին կտեղեկացվի հընթացս: