Քաղաքական-հասարակական գործիչ Միհրան Հակոբյանը ֆեյսբուքյան իր էջում գրառում է կատարել՝ անդրադառնալով «Ադեկվադ» միաբանության համահիմնադիր Արթուր Դանիելյանի հոր վերաբերյալ մամուլում տարածված լուրերին առ այն, որ վերջինս ներգրավվել է որպես մեղադրյալ, խափանման միջոց է ընտրվել չհեռանալու մասին ստորագրությունը, իսկ գործն առնչվում է մոտ 10 տարի առաջ տրված փոխառությանը և դրան հետևած սնանկության գործընթացին:
«Սկզբում թվում էր, թե Արթուր Դանիելյանի հայրիկի հետ կապված պատմությունն ընդամենը պողոսների վարչապետի փոքրոգությունների և քինախնդրության հերթական դրսևորումներից է: Որովհետև մի տեսակ արդեն սովորական է դարձել, որ պողոսների վարչապետը կարմիր գծեր չունի, ընտանիք մտնելու տաբուներ չունի, կաշկանդված չէ «զավակը ծնողի արածի համար պատասխանատու չէ և հակառակը» քրիստոնեական արժեհամակարգով»,- գրել է Հակոբյանը և հավելել, որ իրական պատճառն այլ է. ադեկվադներին չեզոքացնելու, լռեցնելու համար շուրջ 2 տարի վարչապետն ամեն ինչ արել է և Արթուր Դանիելյանի վրա ոչ մի կոմպրոմատ չի գտել:
