Այն օրը Մաշտոցի պողոտայում հարյուրավոր մարդկանց հետ շփվել եմ և նրանց մեջ եղել են գոնե տասնյակներ, որ չեն իմացել՝ ապրիլի 5-ին հանրաքվե է նշանակված։ Պատկերացնու՞մ եք։ Կառավարության այսօրվա նիստում այս մասին հայտարարեց ՀՀ վարչապետ Նիկոլ Փաշինյանը։ «Եկեք դուրս գանք փողոց և մարդկանց հարցնենք՝ ասենք գիտեք, որ կադաստրում սենց բան կա, կարող եք օգտվել։ Ես Ձեզ երաշխավորում եմ, որ 80 տոկոսը կասի՝ չէ։ Ստացվում է՝ մենք այդ ծրագրերն անում ենք ոչ թե մարդկանց կյանքը լավացնելու համար, այլ որովհետև գրանտ ենք ստացել կամ վարկ կա, պետք է արագ ծախսենք ու վերջում գրենք՝ ծրագիրը կատարված է։ Տեղյակ չեն մարդիկ և այդ չտեղեկացվածության մեղավորը մենք ենք»,-նշեց Նիկոլ Փաշինյանը։ ՀՀ փոխվարչապետ Տիգրան Ավինյանը տեղեկացրեց՝ մոտ երեք ամիս առաջ Հանրային կապերի ՊՈԱԿ-ի, Կենտրոնական բանկի և մի շարք այլ գերատեսչությունների հետ անկանխիկ վճարումներ կատարելու վերաբերյալ մի հոլովակ էր նկարահանվել, որը փոխվարչապետի խոսքով սոցիալական ցանցերում բավական լայն տարածում էր ստացել։ Վարչապետը հետաքրքրվեց՝ քա՞նի մարդ է նայել այդ հոլովակը։ Տիգրան Ավինյանը նշեց՝ մինչև 100 հազ., որին ի պատասխան Նիկոլ Փաշինյանը նկատեց. «100 հազարը Դուք համարում եք լայն տարածու՞մ։ Լայն տարածումն այն է, երբ որ դա կունենա 10, 15, 20 մլն դիտում, որովհետև մարդը չորս անգամ պետք է դա նայի, որ կարողանա դա օգտագործել։ Ինչի 15 վայրկյանում, որ նայեց, արդեն հասկացա՞վ՝ ինչ պետք է անի։ 100 հազարն այսօր, կներեք, եթե մեկն ասի իմ ֆեյսբուքյան էջում մի տեսանյութ լայն տարածում է գտել, որովհետև 100 հազ. դիտում ունի, ես կասեմ՝ դա բացարձակապես լայն տարածում չէ։ Հետևաբար ասում եմ՝ ապահովեք, որ դա տարածվի այնքան, որ ունենա 10, 20, 30 մլն. դիտում»,-ընդգծեց վարչապետը։ Տիգրան Ավինյանը համաձայնեց վարչապետի հետ և նկատեց՝ իրազեկվածության պակասի պատճառով շատ լավ գործիքներ քիչ են կիրառվում։ ՀՀ փոխվարչապետը կարծում է՝ Հանրային կապերի ՊՈԱԿ-ի հետ պետք է ընդհանուր ռազմավարություն մշակել՝ նոր գործիքակազմով։ Նիկոլ Փաշինյանն էլ հորդորեց ռազմավարություն մշակել նաև այն մասին, թե ինչ անեն, որ ինքն իր հանձնարարականններին երկորդ, երրորդ անգամ չվերադառնա։ Աղբյուր` Փաստինֆո