ՌԴ Սախալինի շրջանում ոստիկանները կանխել են ընդհատակյա ատամնաբուժարանի գործունեությունը, որտեղ որպես ատամնաբույժ էր աշխատում Չինաստանի քաղաքացի, որը բժշկական կրթություն չունի: Այս մասին տեղեկացնում է ՌԴ ներքին գործերի նախարարության տարածաշրջանային վարչությունը:
Հաղորդվում է, որ տղամարդը երկու ծանոթների հետ վերջերս է եկել Սախալին: Նրանք մասնավոր տան սենյակներից մեկը դարձրել էին ատամնաբուժական սենյակ, իսկ մյուս սենյակում ապրում էին:
«Ատամնաբույժը» շատ վատ է տիրապետում ռուսերենին, այդ պատճառով նրա երկու ծանոթները հաճախորդների հետ շփման ժամանակ հանդես են եկել թարգմանչի և օգնականի դերում:
Ստուգումների ընթացքում իրավապահները պարզել են, որ արտասահմանցիները Ռուսաստան են ժամանել առևտրային վիզայով և իրավունք չեն ունեցել աշխատելու երկրի տարածքում: Բացի այդ, տղամարդն ատամնաբուժությամբ է զբաղվել առանց համապատասխան կրթություն ունենալու` լինելով ինքնուս: Աշխատասենյակում սանիտարահիգիենիկ կանոնները չեն պահպանվել, գործիքները չեն ախտահանվել, օգտագործված նյութերը չեն ոչնչացվել:
Հարուցվել է քրեական գործ` առանց համապատասխան թույլտվության գործունեություն ծավալելու համար:
00:00:00
