Մոտ կես միլիարդ դրամի հափշտակության կատարումը կազմակերպելու համար երեկ ՀՔԾ-ն մեղադրանք առաջադրեց երրորդ նախագահ Սերժ Սարգսյանին։ Խափանման միջոց է ընտրվել ստորագրություն չհեռանալու մասին։ Երբ ՀՔԾ-ն դիզվառելիքի սուբսիդավորման ծրագրով մեղադրանք ներկայացրեց Սերժ Սարգսյանին, համացանցում շրջանառվեց այն միքտը, որ գյուղատնտեսության նախկին նախարար Սերգո Կարապետյանը դավաճան է: Մամուլում եղել են հրապարակումներ, որ մեղադրանքը ներկայացվել է Սերգո Կարապետյանի ցուցմունքի հիման վրա: Ըստ մեղադրանքի, Սերժ Սարգսյանը կառավարությանը հանձնարարել է դիզվառելիքի սուբսիդավորման ծրագրով վառելիք ձեռք բերել Ֆլեշ ընկերությունից, որը պատկանում է նրա ընկեր Բարսեղ Բեգլարյանին: Մինչդեռ, ըստ ՀՔԾ-ի, եղել է ընկերություն, որն առաջարկել է ավելի էժան վառելիք, եւ այդ կերպ պետությունը կխնայեր մոտ կես միլիարդ դրամ: Irakanum.am-ի ունեցած տեղեկություններով Սերժ Սարգսյանին առաջադրված մեղադրանքի շրջանակներում արդեն իսկ հարցաքննվել է նախկին նախարար Սերգո Կարապետյանը։ Մեր ունեցած տեղեկություններով Կարապետյանը Սերժ Սարգսյանի դեմ ցուցմունք տալով փորձել է փրկել իրեն։ Մինչդեռ իրավապահ համակարգի մեր աղբյուրները հայտնում են, որ Կարապետյանին եւս մեղադրանք կառաջադրվի։ Մենք փորձեցինք ՀՔԾ-ից այս տեղեկությունները ճշտել։ ՀՔԾ մամուլի խոսնակ Մարինա Օհանջանյանը հայտնեց, որ նախաքննությունից ելնելով այս պահին որեւէ տեղեկատվություն հայտնել չեն կարող։ Irakanum.am