ԱԺ «Բարգավաճ Հայաստան» խմբակցության պատգամավոր Իվետա Տոնոյանը՝ անդրադառնալով քաղաքապետ Հայկ Մարությանի հայտարարություններին այսօր լրագրողների հետ ճեպազրույցում նշեց, որ հասցեական կամ բովանդակային որևէ հարց քննարկելու փոխարեն Երևանի քաղաքապետը նախապատվությունը տալիս է տարատեսակ թեմաների արծարծմանը։ «Ես շատ ուրախ կլինեի, որ դուք քաղաքապետին անձամբ հարց ուղղելու հնարավորություն ունենայիք, այլ ոչ թե այդ գործառույթը թողներ իր մամուլի խոսնակի վրա: Բոլոր հայտարարությունների հերքման պատասխանատվությունը ստանձնում է նրա մամուլի խոսնակը»,- ասաց Իվետա Տոնոյանը։ «Ինչ վերաբերում է քաղաքապետի հարցազրույցում հնչեցված մտքերին և դրանց իմաստազուրկ լինելուն, որևէ խնդրի բարձրաձայնման դեպքում պարոն Ծառուկյանն ունի դրա բոլոր հիմնավորումները, անհրաժեշտ փաստարկները»,- նշեց Տոնոյանը և հավելեց, որ Ծառուկյանը որևէ կերպ չի անդրադարձել «Մուլտի գրուպ» կոնցեռնի կողմից իրականացվող շինարարությանը։ Իվետա Տոնոյանի պնդմամբ Հայկ Մարությանը պարզապես կարևոր թեմաներից շեղելու քաղաքականություն է որդեգրել։ Ինչ վերաբերում է Աբովյան փողոցում տեղի ունեցող շինարարությանը, Գագիկ Ծառուկյանն արդել ասել է, որ քաղաքապետ Հայկ Մարությանն անձամբ ստորագրել է այդ շինության նախագծման թույլտվությունը, այդ փաստաթուղթը, ըստ նրա, 99 տոկոսանոց շինթույլտվության համար է։ Հարցին, թե արդյոք ճիշտ է քաղաքապետի այն պնդումը, որ Աբովյան փողոցում կառուցվող հյուրանոցի առաջին երկու հարկերը բարձրացվել են, պատգամավորը խնդրեց՝մանրամասների համար դիմել ճարտարապետներին։ «Նախագծման թույլտվություն տրվել է 11 հարկանի հյուրանոց կառուցելու համար։ Ես բացառում եմ, որ կարող է որևէ ապօրինի գործընթաց տեղի ունեցած լինել», -ասաց Իվետա Տոնոյանը։