Նոր կոռուպցիոն սկանդալ է հասունանում Երեւանի քաղաքապետ Հայկ Մարությանի շուրջ։  Մասնավորապես Երևանի ավագանու «Լույս» խմբակցության ղեկավար Դավիթ Խաժակյանը Ֆեյսբուքի ուղիղ եթերի միջոցով քիչ առաջ անդրադառնալով Երևանին աղբատար մեքենաներ նվիրաբերած ընկերություններին, ուշագրավ եւ սկանդալային հայտարարություն է արել։ Հիշեցնենք, որ Երևանի քաղաքապետարանը հրապարակել է նվիարտուների ցանկը, համաձայն, որի քաղաքին աղբատար մեքենաներ են նվիրաբերել հետևյալ ընկերությունները: Սարգիս Խուրշուդյան, Հայրապետ Հովհաննիսյան, «Ն և Ս Քոնսթրաքշն» ՍՊԸ, Հայաստանի Հանրապետությունում Չինաստանի Ժողովրդական Հանրապետության դեսպանություն, «Ալեքս ընդ հոլդինգ» ՍՊԸ, «Էյչ բի Էմ գրուպ»: Դավիթ Խաժակյանի խոսքով՝ «Ն և Ս Քոնսթրաքշն» ՍՊԸ-ն կառուցապատող ընկերություն է: «Եվ մենք փորձելու ենք ստանալ այս կազմակերպությանը տված շինթույլտվությունը, փորձելու ենք հասկանալ, թե երբ են այս մեքենաները նվիրվել: Իմ պնդումը հետևյալն է՝ քաղաքապետարանին նվիրել են այս Կամազները՝ շինթույլտվության դիմաց»,- ասաց Խաժակյանը: Ավելի վաղ քաղաքապետ Հայկ Մարությանը հերքել էր, որ գործարար Սամվել Ալելքսանյանը Կամազներ է նվիրել Երևանին: Սակայն քաղաքապետարանի այսօրվա հրապարակումից պարզ է դառնում, որ Ալեքսանյանին պատկանող «Ալեքս ընդ հոլդինգ» ՍՊԸ-ն երեք Կամազ է նվիրել Երևանին: «Հանրությունը ամիսներ շարունակ չի իմացել այս երևույթի մասին: Այս նվիրատվությունները թաքցվել են հասարակությունից: Բուն խնդիրը ոչ թե այն է, որ համայնքն ստացել է նվերներ, այլ այն է, որ դրանք թաքցվել են քաղաքապետարանի կողմից: Եվ դրանք ոչ թե անհատույց նվերներ են, այլ կոնկրետ բանի դիմաց: Եվ ես կրկին բարձրաձայնում եմ՝ այս ցանկը մենք համադրելու ենք ստացված շինթույլտվությունների հետ և հասկանանք՝ բոլոր այս կազմակերպությունները, ովքեր, այսպես կոչված, նվիրատվություն են արել, դա նվիրատվություն է, թե բարտեր»,- ասաց Խաժակյանը: Խաժակյանի հայտարարությամբ ակնհայտ է դառնում, որ ըստ էության գործարք է կատարվել Հայկ Մարությանի եւ տվյալ ընկերության միջեւ, ինչի պատճառով էլ քաղաքային իշխանությունները փորձում էին ամեն կերպ գաղտնի պահել նվիրատուների ցանկը։ Արդյո՞ք Հայկ Մարությանը միայնակ է գործել, այս սխեմայի մասին տեղյակ ե՞ն կենտրոնական իշխանությունները, թե՞ ոչ։ Եվ, ի վերջո ինչով էր պայմաավորված Մարությանի՝ արձակուրդից վերադառնալուց հետո կրկին արձակուրդի մեկնելու հրատապ որոշումը։ Սրանք հարցեր են, որոնց պատասխանները իշխանությունները պարտավոր են տալ։ Հայկ Մարությանի հեռացման մեկնարկը տրված է։ Irakanum.am