Ինչպես հայտնել ենք, Հոկտեմբերի 27-ի    գործով ահաբեկչական խմբավորման ղեկավար Նաիրի Հունանյանը, որը դատապարտված է ցմահ ազատազրկման և իր պատիժը կրում է «Երևան Կենտրոն» քրեակատարողական հիմնարկում, դիմել է վաղաժամկետ ազատ արձակման խնդրանքով։ Այս մասին  լրատվամիջոցներին հայտնել   է   ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանը։ Ըստ վերջինիս՝ Հունանյանը համապատասխան դիմում է ներկայացրել մոտ երկու շաբաթ առաջ, այն ընթացքի մեջ է։ «87 օրվա ընթացքում է զեկույցը քննարկվում, ինչից հետո զեկույցի հիման վրա տրվում է բացասական կամ դրական պատասխան», - նշել է Նավիկյանը՝ հավելելով, որ «քանի որ Հունանյանի ազատազրկման 20 տարին լրացել է, 20 տարուց հետո ցմահ դատապարտյալները իրավունք ունեն դիմել պայմանական վաղաժամկետ ազատման համար»։ «Չեմ կարող ասել, թե գործընթացն ինչքան կարող է տևել, որովհետև ամեն դատապարտյալի դեպքում ժամկետները տարբեր են լինում», -  նշել էր  ՀՀ ԱՆ քրեակատարողական ծառայության հանրային կապերի բաժնի պետը։ Անդրադառնալով վերոնշյալ թեմային՝ ԱԺ «Իմ քայլը»  խմբակցության անդամ Թագուհի Թովմասյանը  irakanum.am-ի հետ զրույցում նշեց․ «Լինելով ԱԺ  Մարդու իրավունքների պաշտպանության եւ հանրային հարցերի մշտական հանձնաժողովի անդամ, ցավալի արձանագրում պետք  է անեմ․ ես կարծում եմ՝ որևէ իրավապահ մարմին  չպետք է   անգամ քննարկման առարկա  դարձնի Նաիրի Հունանյանի դիմումը, քանի որ նրա արարքը  որևէ տրամաբանության մեջ չի մտնում»։ Թագուհի Թովմասյանն ընդգծեց՝ այն ոճրագործությունը, որն իրագործել   է Նաիրի Հունանյանն իր ընկերների հետ միասին,  որևէ  դեպքում ներել չի կարելի։