Այլ երկրներում սովորողները տարկետում ստանալու համար պետք է դիմեն ԿԳՄՍ նախարարություն

Օտարերկրյա պետություններում հանրակրթական, ինչպես նաեւ հիմնական կրթության հիմքի վրա առանց ընդհատման նախնական (արհեստագործական) կամ միջին մասնագիտական կրթական ծրագրերով սովորող ՀՀ քաղաքացիները տարկետում ստանալու համար պետք է դիմեն ՀՀ կրթության, գիտության, մշակույթի եւ սպորտի նախարարություն` ներկայացնելով հետեւյալ փաստաթղթերը` • դիմում ՀՀ ԿԳՄՍ նախարարի անունով, • քաղաքացու անձնագրի կամ նույնականացման քարտի, դրանց բացակայության դեպքում՝ անձը հաստատող այլ փաստաթղթի պատճենը, • ուսումնական հաստատության կողմից տրված տեղեկանքը՝ կրթական ծրագրի տեսակի եւ համապատասխան կրթական ծրագրով քաղաքացու ուսումնառության սկզբի եւ ավարտի ժամկետների վերաբերյալ վավերացված՝ նոտարական կարգով հաստատված հայերեն թարգմանությամբ, • տարածքային զինվորական կոմիսարիատի կցագրման վկայականը, • նախնական (արհեստագործական) կամ միջին մասնագիտական կրթական ծրագրով սովորողները պետք է ներկայացնեն նաեւ հիմնական կրթության ավարտական /9-րդ դասարանի/ վկայականի պատճենը, եթե օտարերկրյա պետության վկայական է՝ նոտարական կարգով հաստատված հայերեն թարգմանությամբ: Համաձայն «Զինվորական ծառայության եւ զինծառայողի կարգավիճակի մասին» ՀՕ-195Ն օրենքի 22-րդ հոդվածի եւ ՀՀ կառավարության 12.04.2018թ. 430-Ն որոշմամբ հաստատված «Նպատակային ուսումնառության համար քաղաքացուն զինվորական ծառայության զորակոչից տարկետում տալու եւ տրված տարկետումը դադարելու պայմանները սահմանելու մասին» կարգի` այն քաղաքացիները, որոնց 18 տարին արդեն լրացել է կամ լրանում է մինչեւ դեկտեմբերի 31-ը, փաստաթղթերը պետք է ներկայացնեն մինչեւ 2019 թ. նոյեմբերի 15-ը: Այն քաղաքացիները, որոնց 18 տարին լրանում է հունվարի 1-ից հունիսի 30-ն ընկած ժամանակահատվածում, փաստաթղթերը կարող են ներկայացնել մինչեւ 2020 թ. մայիսի 15-ը: