Եվրասիական լիգայի կանոնավոր առաջնություն, 2-րդ մրցափուլուլում  Ղազախստանի «Բարսի Ատիրաու»-ն հաղթեց Հայաստանի «Ուրարտու Վբեթ»-ին 85-83  հաշվով։ Հանդիպման ամենաարդյունավետ բասկետբոլիստ է ճանաչվել «Բարսիի» ներկայացուցիչ Դոնտե Մակգիլը, որը վաստակել է 39 միավոր: Հիշեցնենք` «Ուրարտու Վբեթը» հոկտեմբերի 2-ին 99-79 հաշվով առավելության էր հասել «Արսենալ Տուլայի» նկատմամբ: Հանդիպման  գրեթե ողջ   ընթացքում «Ուրարտու Վբեթ»-ն առաջատարի դիրքերում  էր,  միայն վերջին մի քանի րոպեների ընթացքում «Ուրարտու Վբեթ»-ի մարզիկները և նույնիսկ  գլխավոր մարզիչը  զարմանալիորեն ու անհասկանալիորեն տուգանքներ ստացան և մրցակիցը ընդամենը մի քանի միավորով առաջ անցավ ու հաղթեց։ Irakanum.am-ի թղթակիցը դիմեց «Ուրարտու Վբեթ»-ի գլխավոր մարզիչ Միքայել Պողոսյանին՝ փորձելով պարզել՝ ինչպե՞ս ստացվեց, որ «Բարսի»-ն անսպասելիորեն հաղթեց՝ հանդիպման վերջին րոպեներին միավորներ ստանալով։ «Խաղի վերջում մենք  տուգանքների  հետ կապված՝ խնդիր ունեցանք, և  մեր երկու ստարտային խաղացողները   նստարանին նստած մնացին 5 ֆոլով (5   տուգանք)։ Ճիշտն ասած՝ չհասկացա, բայց վերջում մի քանի տեխնիկական ֆոլ եղավ մրցավարների կողմից, և դա խաղը միանգամից փոխեց։ Վերջում, երբ մնում էր երեք վայրկյան, դաբլներ տվեցին ու խաղը փոխվեց, նույնիսկ ինձ տեխնիկական տուգանք տվեցին։ Մրցավարները տեխնիկական  տուգանք տալիս են, եթե  բարձր ես խոսում, վատ բան  ասում, հայհոյում, բայց երբ խոսում ես բասկետբոլի մասին, ասում ես՝ նայի՛ր,  սա այսպես  է, նա  այնպես  է,  և տուգանք է լինում դրա համար․․․ դա մի քիչ անհասկանալի է։ Հասկանալի է,  երբ մարզիկը խոսի  մրցավարի հետ ու  նման բան լինի, բայց երբ գլխավոր մարզիչն ուղղակի խոսում է բասկետբոլի մասին ու տուգանք ստանում դրա համար․․․ ես  չգիտեմ՝ ինչպես է նման բան  ստացվում», - նշեց «Ուրարտու Վբեթ»-ի գլխավոր մարզիչ Միքայել Պողոսյանը։