«Տիկին Մակունց, հիասթափված եմ, որովհետև այն, ինչ դուք և Ձեր խմբակցությունը ներկայացնում եք այս փաստաթղթում, որպես ՍԴ նախագահ Հրայր Թովմասյանի լիազորությունները դադարեցնելու հիմք, չափազանց թույլ է»,- ԱԺ-ում ՍԴ նախագահ Հրայր Թովմասյանի լիազորությունները դադարեցնելու նախագծի քննարկման ժամանակ հայտարարել է ԱԺ պատգամավոր Արման Բաբաջանյանը։
Պատգամավորը նշեց, որ նախագիծը չի լուծում և չի կարող լուծել ՍԴ-ի խնդիրը. «Այն նույնիսկ չի կարող և չի լուծելու դատարանի լիազորություններին տիրացած Հրայր Թովմասյանի հարցը»։
Բաբաջանյանն ընդգծեց, որ այս նախաձեռնությունն ավելի շատ ճգնաժամի խորացում է, ԱԺ նախագահի, վարչապետի կողմից հնչեցված քաղաքական և իրավական դիրքորոշումների թուլացում ու արժեզրկում է։
«Պետք է մեկընդմիշտ արձանագրենք, որ դատարանը դուրս է եկել Սահմանադրության ուղեծրից և դա ոչ միայն Հրայր Թովմասյանով է պայմանավորված, այլև մյուս անդամներով, ուստի իրավունք չունենք մեր մանդատն անարդյունավետ դարձնել և գնալ այս զարտուղի ճանապարհով»,-ասաց անկուսակցական պատգամավորը։
Բաբաջանյանը հայտնեց, որ Հրայր Թովմասյանի պաշտոնանկության վերաբերյալ նոր նախագիծ է դրել շրջանառության մեջ, առ այն, որ ՀՀ ԱԺ-ի 6-րդ գումարման պատգամավոր Հրայր Թովմասյանը, Հայաստանի ՍԴ անդամ ընտրվելու իրավունքը դեռևս չծագած պայմաններում ընտրվել է ՍԴ անդամ և պաշտոնավարել անհամատեղելիության պահանջներին հակառակ։
Մանրամասները՝ տեսանյութում։
00:00:00
