Էմիրաթցի գործարարները հետաքրքրված են ՀՀ-ում ներդրումային հնարավորությունների առավել բացահայտումով. ԱՄԷ պետնախարար

Արաբական Միացյալ Էմիրությունների պետնախարար Ահմեդ Ալի Ալ-Սայեղի եւ ՀՀ ԱԳՆ գլխավոր քարտուղար Վահագն Մելիքյանի գլխավորությամբ Երեւանում կայացած հայ-էմիրաթական միջկառավարական համատեղ հանձնաժողովի անդրանիկ նիստի ընթացքում ԱՄԷ պետնախարարը, ողջունելով միջկառավարական համատեղ հանձնաժողովի նիստի նախագահ Վահագն Մելիքյանին եւ հայկական պատվիրակության անդամներին, շնորհակալություն է հայտնել ջերմ ընդունելության եւ նիստը բարձր մակարդակով կազմակերպելու համար: Ապա նշել է, որ նիստն արտացոլում է երկկողմ հարաբերությունն ի շահ երկու բարեկամ ժողովուրդների զարգացնելու երկուստեք ձգտումը՝ հավելելով, որ նախորդ տարիների ընթացքում ԱՄԷ-ի եւ ՀՀ-ի միջեւ երկկողմ հարաբերություններում շոշափելի առաջընթաց է արձանագրվել մի շարք ոլորտներում։ Համատեղ ջանքերի արդյունքում երկու երկրների բարձրաստիճան պաշտոնյաների փոխայցելություններ են կազմակերպվել եւ ստորագրվել են մի շարք կարեւոր տնտեսական համաձայնագրեր, ինչը զգալիորեն նպաստել է երկու երկրների միջեւ առեւտրաշրջանառության, ներդրումների եւ զբոսաշրջության ամրապնդմանը։ Այս համատեքստում պետնախարարը հատուկ կարեւորել է 2019թ․ հունվարին ՀՀ նախագահ Արմեն Սարգսյանի Էմիրություններ կատարած այցը եւ նրա մասնակցությունը Աբու Դաբիի ‹‹Կայունության շաբաթ›› համաժողովին, ինչպես նաեւ 2017թ․ հուլիսին ԱՄԷ արտաքին գործերի եւ միջազգային համագործակցության նախարար Շեյխ Աբդալլահ Բին Զայեդ Ալ Նահյանի Երեւան կատարած այցը, որոնք նպաստել են երկու երկրների միջեւ երկկողմ հարաբերությունների ամրապնդմանը եւ զարգացմանը։ Վերահաստատելով երկկողմ տնտեսական հարաբերությունների ռազմավարական նշանակությունը՝ Ալ-Սայեղը նշել է, որ ԱՄԷ-ն համարվում է հայկական արտադրանքի արտահանող 8-րդ ամենամեծ շուկան եւ ամբողջ աշխարհով հայկական ներմուծումների 11-րդ աղբյուրը։ Նախարարը հավելել է նաեւ, որ վերջին տարիներին երկկողմ առեւտրաշրջանառությունն արձանագրել է բացառիկ աճ` նշելով, որ 2014-2017թթ․ընկած ժամանակահատվածում տարեկան կուտակային աճի տեմպը կազմել է 14 տոկոս, իսկ 2017թ.-ին առեւտրաշրջանառությունը 2016թ-ի համեմատ աճել է 78 տոկոսով։ Այս աճը հանդիսանում է գործադրած ջանքերն ամրապնդելու եւ երկու երկրների միջեւ արտահանումն ու ներմուծումն ավելի խրախուսելու հիմնական խթան։ Երկուստեք հետաքրքություն ունեցող ապրանքների շարքում առաջնահերթություն են սննդամթերքը, օգտակար հանածոները, հիմնային հանքանյութերը եւ նավթաքիմիական նյութերը։ Խոսելով ներդրումների մակարդակից՝ պետնախարարն ընդգծել է, որ էմիրաթցի գործարարները հետաքրքրված են Հայաստանում ավելի շատ ներդրումային հնարավորություններ բացահայտելով, հատկապես առեւտի տեսանկյունից հեռանկարային ոլորտներում, ինչը կնպաստի Հայաստանի կառավարության ձգտումների իրականացմանը, այն է․ բազմազանեցնել արտաքին եկամուտի աղբյուրները, էներգիայի աղբյուրները եւ նվազեցնել դրանց գեներացնելու ծախսերը։ Այս համատեքստում կարեւորել է Էմիրաթական կազմակերպությունների համաշխարհային փորձը եւ առանձնահատուկ մակարդակը էլեկտրաէներգիայի արտադրության, վերականգնվող էներգիայի, հանքագործության եւ գյուղատնտեսության ոլորտներում, ինչը ամուր հիմք է ներդրող կազմակերպությունների համար եւ փոխշահավետ երկու երկրների համար։ Անդրադառնալով երկու բարեկամ երկրների ժողովուրդների միջեւ հարաբերությունների մակարդակին՝ նախարարը մեծապես կարեւորել է Հայաստան այցելող Էմիրաթցի զբոսշրջիկների թվի աճի արագ տեմպերը՝ նշելով, որ անցյալ տարի էմիրաթցի զբոսաշրջիկների թիվը հասել է 11,134-ի՝ 2017թ․ 7,705 ցուցանիշի համեմատ։ Ակնկալվում է, որ երկու երկրների միջեւ տարբեր ոլորտներում զարգացող համագործակցության շնորհիվ էմիրաթցի զբոսաշրջիկների թվիը Հայաստանում կշարունակի աճել առաջիկա տարիներին եւս: Ողջունելով էմիրաթական պատվիրակությանը՝ ՀՀ ԱԳՆ գլխավոր քարտուղար Վահագն Մելիքյանը կարեւորել է միջկառավարական հանձնաժողովների գործունեությունը, որոնք գործնական հարթակ են՝ բացահայտելու եւ կանոնավոր հիմքերի վրա դնելու երկկողմ կապերի նոր հնարավորությունները բազմաթիվ ոլորտներում, դյուրացնելու միջպետական համագործակցությունը` նշելով, որ Էմիրությունների հետ Հայաստանի ունեցած ավանդական եւ ընդգծված ջերմ հարաբերությունների մասին են վկայում երկրների միջեւ ստորագրված երկու տասնյակից ավելի փաստաթղթերը, բազում բարձրաստիճան փոխայցելությունները, խորհրդակցությունները, գործարար հանդիպումները, փորձագիտական այցերը եւ այսօր առկա շաբաթական մինչեւ 13 ավիաչվերթների իրականացումը: Նա նշել է, որ Հայաստանը դիտարկում է ԱՄԷ-ն` որպես կարեւորագույն կամուրջ Հայաստանի եւ Ծոցի տարածաշրջանի երկրների միջեւ։ Միեւնույն ժամանակ առաջարկել է դիտարկել Հայաստանը Էմիրությունների համար ԵԱՏՄ երկրների շուկա մուտք գործելու առաջնային դարպաս: Նա վստահեցրել է, որ հայ-էմիրաթական առեւտրատնտեսական հարաբերությունների ոլորտում մեծ ներուժ կա, որի ի հայտ բերումը նոր հորիզոններ կբացի փոխշահավետ համագործակցության հետագա խթանման համար տնտեսության տարբեր ոլորտներում, մասնավորապես՝ զբոսաշրջության, առեւտրի, ենթակառուցվածքների զարգացման, գյուղմթերքի արտահանման, սննդի անվտանգության եւ գիտելիքահեն տեխնոլոգիաների ոլորտներում: Հայ-էմիրաթական միջկառավարական համատեղ հանձնաժողովի առաջին նիստի շրջանակներում ԱՄԷ պետնախարար Ահմադ Ալի Ալ-Սայեղը եւ նրա գլխավորած պատվիրակությունը հանդիպումներ են ունեցել նաեւ ՀՀ նախագահ Արմեն Սարգսյանի, վարչապետ Նիկոլ Փաշինյանի, ԱԺ նախագահ Արարատ Միրզոյանի, ԱԳՆ նախարար Զոհրաբ Մնացականյանի եւ ՊՆ նապարար Դավիթ Տոնոյանի հետ: Միջկառավարական համատեղ հաձնաժողովի օրակարգի երկրորդ օրը երեկոյան ԱՄԷ պետնախարարն այցել է Թումո ստեղծարար տեխնոլոգիաների կենտրոն եւ ծանոթացել կենտրոնի գործունեությանն ու կրթական ծրագրին: Հայ-էմիրաթական միջկառավարական հանձնաժողովի շրջանակներում ստորագրվել է 2 փոխըմբռնման հուշագիր՝ հայկական պետական «Արմենպրես» լրատվական գործակալության եւ Էմիրաթական «WAM» լրատվական գործակալության միջեւ, ինչպես նաեւ Աբու Դաբիի համաշխարհային շուկայի եւ ՀՀ Կենտրոնական բանկի միջեւ: Հատկանշական է, որ ՀՀ-ի եւ ԱՄԷ-ի միջեւ դիվանագիտական հարաբերությունները հաստատվել են 1998թ.-ին: 2012թ.-ին բացվել է Աբու Դաբիում ՀՀ դեսպանատունը, իսկ արդեն 2014թ.-ին ԱՄԷ նախագահ Նորին Մեծություն Շեյխ Խալիֆա Բին Զայեդ Ալ-Նահյանի թիվ 171 հրամանի համաձայն` հիմնադրվել է ԱՄԷ դեսպանատունը ՀՀ-ում: ՀՀ-ԱՄԷ առեւտրաշրջանառությունը 2017թ.-ին կազմել է 249,3 մլն դոլար, իսկ երկու երկրների միջեւ շաբաթական օդային չվերթների քանակը հասել է 14-ի, (Ֆլայ Դուբայ -7 չվերթ, ալ-Արաբիա -7 չվերթ): 2017թ.-ին Հայաստան է այցելել 7,705 էմիրաթցի զբոսաշրջիկ, իսկ Հայաստանից Էմիրություններ ացելած զբոսաշրջիկների թիվը հասել է 21,963 -ի: