Հայաստանի և Ֆինլանդիայի արտաքին քաղաքական գերատեսչությունների միջև ապրիլի 16-ին Հելսինկիում անցկացվել են քաղաքական խորհրդակցություններ։
Հայկական պատվիրակությունը գլխավորել է ԱԳՆ Եվրոպայի վարչության պետ Տիգրան Սամվելյանը, իսկ ֆիննականը՝ ԱԳՆ Ռուսաստանի, Արևելյան Եվրոպայի և Կենտրոնական Ասիայի դեպարտամենտի գլխավոր տնօրեն Մաիմո Հենրիկսոնը (Maimo Henriksson)։
Այս մասին տեղեկացնում ենՀՀ արտաքին գործերի նախարարության լրատվության և հանրային դիվանագիտության վարչությունից, հանդիպման մեկնարկին կողմերը կարևորել են խորհրդակցությունների անցկացման պարբերականության պահպանումը, անդրադարձել երկու երկրներում ընթացող ներքաղաքական զարգացումներին։
Զրուցակիցները քննարկել են հայ-ֆիննական քաղաքական օրակարգի հարցերի լայն շրջանակ, կարևորել համագործակցության հետագա խորացումը երկկողմ հետաքրքրություն ներկայացնող ոլորտներում։ Անդրադարձ է կատարվել Հայաստան-ԵՄ հարաբերություններին, Արևելյան գործընկերությանը, քննարկվել է միջխորհրդարանական կապերի ամրապնդման, միջազգային կազմակերպությունների շրջանակներում երկու երկրների համագործակցության ընդլայնման հեռանկարները:
Հայկական պատվիրակության ներկայացուցիչներն իրենց ֆին գործընկերներին ներկայացրել են վերջին տարում Հայաստանում տեղ գտած զարգացումները, կառավարության կողմից իրականացվող բարեփոխումների գործընթացը՝ ուղղված ժողովրդավարության, մարդու իրավունքների պաշտպանության և օրենքի գերակայության ամրապնդմանը, ինչպես նաև երկրում հռչակված տնտեսական հեղափոխության առաջնայնությունները։
