Դեռեւս տարեսզկբին ՀՀ Կառավարության աշխատակազմի ղեկավար Էդուարդ Աղաջանյանը հայտարարեց, որ վարչապետի աշխատակազմը որոշել է կրճատել ծառայողական մեքենաների թիվը՝ 50-ից հասցնելով 7-ի։ Աշխատակազմի ղեկավար Էդուարդ Աղաջանյանը վստահեցրել էր, որ ինքը ևս հրաժարվել է ծառայողական մեքենայից։ Այս որոշման արդյունքում հնարավոր կլինի տնտեսել 130-150 միլիոն դրամ տարեկան։ Ըստ Աղաջանյանի՝ «հեղափոխությունն է իրենց պատվիրակել նման գործելաոճ»։ Ի դեպ կրճատված վարորդներին Աղաջանյանը առաջարկել էր տաքսի քշել։ Իսկ ահա հունվարի 24-ին Աղաջանյանը ֆեյսբուքյան իր էջում գրառում էր արել․ ՀՀ վարչապետի աշխատակազմին սպասարկող ավտոմեքենաների թիվը կտրուկ կկրճատվի։ Ներկայիս 50-ի փոխարեն կմնան 7-ը։ Այս պահին իրենց կցված վարորդով ծառայողական ավտոմեքենաներից են օգտվում հետևյալ պաշտոնյաները. - ՀՀ փոխվարչապետեր - Վարչապետի աշխատակազմի ղեկավար - ԱԽ քարտուղար - Աշխատակազմի ղեկավարի տեղակալներ - Աշխատակազմի վարչության պետեր - Աշխատակազմին ենթակա գրասենյակների պետեր - Վարչապետի խորհրդականներ - Վարչապետի որոշ օգնականներ Փոփոխությունների արդյունքում իրենց կցված ծառայողական ավտոմեքենաներից կօգտվեն. - Երկու փոխվարչապետերը - ԱԱԽ քարտուղարը Եվ վերջ Ինքս ևս կհրաժարվեմ ծառայողական ավտոմեքենայից։ Վարորդներն արդեն ծանուցվել են ըստ օրենքի պահանջի։ Այս հայտարարությունից եւ գրառումներից ու վստահեցումներից ամիսներ անց, սակայն Irakanum.am-ին հայտնի է դարձել, որ Էդուարդ Աղաջանյանը չի հրաժարվել իրեն սպասարկող ծառայողական մեքենայից։ Մեզ հայտնի է դարձել, որ թղթաբանությամբ Աղաջանյանը ձեւակերպել է այնպես, որ իրեն ամրակցված չէ ծառայողական մեքենան, սակայն փաստացի մեքենայից աշխատակազմի ղեկավարը օգտնվում է։  Մեր աղբյուրների փոխանցմամբ «հանձնած» մեքենան ձեւակերպվել է որպես պահեստային։ Ի տարբերություն մյուս վարորդների, ովքեր աշխատել են եւ կրճատումների արդյունքում աշխատանքից ազատվել են, Էդուարդ Աղաջանյանի վարորդը շարունակում է աշխատանքը։ Ըստ էության Աղաջանյանի մոտ թղթերով ամեն ինչ կարգին է։ Նշենք, որ մենք փորձեցինք պարզաբանում ստանալ Էդուարդ Աղաջանյանից, սակայն վերջինս մեր հեռախոսազանգերին չպատասխանեց։ Պատրաստ ենք հրապարակել նաեւ կառավարության աշխատակազմի պարզաբանումը։ Irakanum.am