ՅՈՒՆԻՍԵՖ-ը զգուշացնում է Հայաստանում համացանցի օգտատեր 15–24 տարեկան երիտասարդների առցանց բռնության, կիբեր-բուլիինգի եւ թվային ոտնձգությունների ենթարկվելու վտանգի մասին եւ կոչ անում համաձայնեցված գործել կանխարգելելու ու վերջ դնելու երեխաների եւ երիտասարդների հանդեպ բռնությունը համացանցում: Անվտանգ համացանցի օրվա այս կոչը հիմնված է ՅՈՒՆԻՍԵՖ-ի՝ ավելի քան 160 երկրից ավելի քան 1 մլն երիտասարդների մասնակցությամբ իրականացրած հարցումների արդյունքների վրա: Երիտասարդները բովանդակալից պատասխաններ են տվել, թե ինչ պետք է անեն իրենց ծնողները, ուսուցիչները եւ քաղաքականություն մշակողները երեխաների անվտանգությունը պաշտպանելու համար: Նրանց կարծիքով բուլիինգը եւ կիբեր բուլիինգը կանխարգելող ամենահզոր գործիքներից մեկը բարությունն է: «Մենք լսել ենք աշխարհի տարբեր ծայրերում երեխաներին ու երիտասարդներին եւ նրանց ասելիքը հստակ է՝ համացանցում բարությունն անհետանում է»,- ասում է Հայաստանում ՅՈՒՆԻՍԵՖ-ի ներկայացուցիչ Տանյա Ռադոչայը: «Ահա թե ինչու Անվտանգ համացանցի օրը ՅՈՒՆԻՍԵՖ-ը բոլորին կոչ է անում առցանց տիրույթում լինել բարի եւ համացանցը բոլորի համար անվտանգ դարձնելու ջանք չխնայել»: Բարձր եկամուտ ունեցող երկրներում կիբեր բուլիինգի տարածվածության վերաբերյալ ՅՈՒՆԵՍԿՈ-ի տվայլների համաձայն՝ երեխաների եւ երիտասարդների 5–21 տոկոսը կիբեր բուլիինգի զոհ է դառնում: Ի դեպ աղջիկների՝ կիբեր բուլիինգի ենթարկվելու հավանականությունն ավելի բարձր է, քան տղաների դեպքում: Աշխարհում 15–24 տարեկան երիտասարդների միջինը 70,6 տոկոսը համացանցի օգտատեր է: Հայաստանում առցանց բնակչությունը գնալով ավելի է երիտասարդանում. մինչեւ 15 տարեկան երեխաների 54,1 տոկոսը համացանցի օգտատեր է: Չնայած նրան, որ ավելի մեծ տարիքի երեխաներն ավելի հավանական է, որ ենթարկվեն կիբեր բուլիինգի, ոչ մեկը պաշտպանված չէ վտանգավոր բովանդակությունից, սեռական շահագործումից եւ թիրախավորված վիրավորանքներից: Կիբեր բուլիինգը կարող է մեծ վնաս հասցնել, քանի որ կարող է արագ հասնել լայն լսարանի. այն կարող է անորոշ ժամանակով մնալ առցանց կամ «հետեւել» իր զոհերին ամբողջ կյանքում: Կիբեր բուլիինգի զոհերը ավելի հակված են ալկոհոլի եւ թմրանյութերի օգտագործմանը եւ դպրոցից հաճախ բացակայելուն։ Ավելի հավանական է նաեւ, որ նրանք վատ գնահատականներ ստանան, ցածր ինքնագնահատական եւ առողջական խնդիրներ ունենան։ Ծայրահեղ դեպքերում կիբեր բուլինգը նույնիսկ ինքնասպանության է դրդում։ «Երեխայի իրավունքների մասին կոնվենցիայի ընդունումից եւ համացանցի ստեղծումից երեսուն տարի անց, վրա է հասել մի ժամանակ, երբ կառավարությունները, ընտանիքները, կրթօջախները եւ հատկապես մասնավոր հատվածը պետք է երեխաներին եւ երիտասարդներին դնեն թվային քաղաքականության կենտրոնում»,- ասել է Հայաստանում ՅՈՒՆԻՍԵՖ-ի ներկայացուցիչ Տանյա Ռադոչայը: «Պաշտպանելով վատագույնից՝ համացանցը պետք է առաջարկի ու հասանելի դարձնի լավագույնը. մենք յուրաքանչյուրս կարող ենք օգնել ճիշտ հաշվեկշիռ սահմանել այս գործում»: