Վարչապետ Նիկոլ Փաշինյանն այսօր լրագրողների հետ զրույցում անդրադարձավ հարցին, թե ի՞նչ դիրքորոշում ունի ոստիկանությունն ու ԱԱԾ-ն վարչապետի վերահսկողությունից հանելու և սուպերվարչապետությունից հրաժարվելու հարցի մասին: «Ընդհանուր առմամբ կարող եմ ասել, որ միանաշնակ է, որ պետական մարմինները պետք է լինեն խորհրդարանական վերահսկողության ներքո: Բայց դա չի նշանակում, որ դրա ճանապարհը նախարարություն դարձնելն է: Ի՞նչ է նշանակում նախարարություն ոստիկանության պարագայում, նշանակում է, որ քաղաքական դեմք պետք է նշանակվի այդ ուժային կառույցի ղեկավար: Սրանից բխում է, որ այդ ուժային կառույցը ուղղակի կամ անուղղակի կուսակցականացվելու է: Այսօր կարգավորման արդյունքում ոստիկանության և իրավապահ համակարգի կայունությունը որոշակիորեն պահպանվել է: Այսինքն՝ այնտեղ փոփոխությունները, այդ թվում՝ կադրային փոփոխությունները լինում են շատ բալանսավորված ու հանգիստ, որպեսզի բալանսը չխաթարվի և դրանից երկրի անվտանգությունը չխաթարվի: Իսկ նախարարի դեպքում հայեցողական պաշտոն է, կարելի է ցանկացած մեկին նշանակել այդ ուժային կառույցի ղեկավար»,- ասաց նա: Ըստ Փաշինյանի՝ վերջն տարիների ընթացքում նախորդ տարի աննախադեպ դեպք է տեղի ունեցել, երբ ԱԱԾ տնօրենը գնացել է խորհրդարան ու անձամբ բյուջեի կատարողականի քննարկումներին մասնակցել: «Սուպերվաչապետության մասին ես ասել եմ՝ այն, որ մենք սուպերվարչապետության համակարգից պետք է բալանսավորման գնանք, միանշանակ է: Բայց էլի եմ ասում՝ այդ պրոցեսը պետք է հասկանալ: Մարդիկ ուզում են, որ մի օրում դա արվի, այո, կարող ենք մեկ օրում անել, բայց կարող է պարզվել, որ ամբողջ իշխանությունը կաթվածահար եղավ, և երկրում անիշխանություն ստեղծվեց: Այսինքն՝ եկեք ասեք, էդ ի՞նչ սպառնալիք ենք մենք ստեղծում այսօր Հայաստանում օրինականության, ժողովրդավարության, թափանցիկության համար: Այսօր ՀՀ պետական կառավարման համակարգը թափանցիկ է առավել, քան երբևէ»,- հավելեց նա: Հարցին, թե այսինքն՝ հնարավոր է մեկ-երկու տարի՞ տևի այդ գործընթացը, Փաշինյանը պատասխանեց. «Կարող է պրոցես լինի, որ 3-4 տարվա ընթացքում տեղի ունենա: Ի՞նչ է տեղի ունեցել, վերջին 8-9 ամիսներին համոզվեցիք, որ Հայաստանում դիկտատուրա՞ է հաստատվել»: