Ամանորի գիշերը դժբախտ պատահար է տեղի ունեցել Էրեբունի համայնքում։ Էրեբունու փողոցի թիվ 21/1 շենքի 7-րդ հարկի բնակարաններից մեկում հրդեհ է բռնկվել, ինչի հետեւանքով բնակարանն ամբողջ գույքով այրվել է։ Irakanum.am-ին մանրամասներ են հայտնի դարձել հրդեհից։ Մեզ պատմեցին, որ հրդեհի պահին տանը ոչ ոք չի եղել, նախնական տեղեկություններով՝ հրդեհը բռնկվել է օդորակիչի այրվելու արդյունքում։ Հրդեհի հետեւանքով ծուխն արագ տարածվել է ողջ շենքով մեկ, որոշ բնակիչների ինքնազգացողությունը վատացել է։ Հարեւաններից մեզ պատմեցին, որ շենքի 8-րդ հարկի բնակիչներից մեկը ծխից թունավորման ախտանշաններով տեղափոխվել է հիվանդանոց, սակայն նրա վիճակը ծանր չէ։ Հարեւանները պատմեցին, որ որքանով իրենք տեղյակ են՝ տեղի ունեցածի մասին իմանալուց հետո վատացել է նաեւ տանտիրոջ ինքնազգացողությունը։ Նշենք, որ հրդեհից հետո շենքն ամբողջովին զրկվել էր հոսանքից, ջրից ու գազամատակարարումից։ Դեպքից ժամեր անց միայն դրանք վերականգնվել են։ Շենքն արտաքինից բավական վատ վիճակում է, ծխի հետեւանքով կեղտոտվել է թե շենքը, թե բակը, բնակիչները հույս ունեն, որ պատկան մարմինները արագ կվերացնեն խնդիրը։ Irakanum.am-ի հետ զրույցում նրանք նշեցին, որ չնայած հանգստյան օրեր են, այդուամենայնիվ իրենք հույս ունեն, որ պատկան մարմինները արագ կլուծեն խնդիրը։ Նշենք նաեւ, որ շենք մուտք գործելիս ծխի հոտը դեռ բավական ուժեղ զգացվում է։