Երևանի Զաքարիա Քանաքեռցու փողոցում երկու ավտոմեքենա իրար են բախվել:  ՀՀ ԱԻՆ-ը տեղեկացնում է, որ դեկտեմբերի 28-ին, ժամը 23:52-ին «911» ծառայությանն ահազանգ է ստացվել, որ Երևան քաղաքի Զաքարիա Քանաքեռցու փողոցում՝ «Հայք» սուպերմարկետի մոտակայքում, տեղի է ունեցել ճանապարհատրանսպորտային պատահար՝ բախվել է 2 ավտոմեքենա, կա արգելափակված քաղաքացի. անհրաժեշտ է փրկարարների օգնությունը: Դեպքի վայր է մեկնել ԱԻՆ Փրկարար ծառայության հատուկ նշանակության փրկարարական աշխատանքների իրականացման կենտրոնի փրկարարական ջոկատը: Պարզվել է, որ բախվել են «Mercedes C» մակնիշի (վարորդը՝ Ս. Հ., ծնված 1988 թ.) և «ՎԱԶ-2109» մակնիշի (վարորդը՝ Հ. Չ., ծնված 1994 թ.) ավտոմեքենաները: Մինչ փրկարարների՝ կանչի վայր հասնելը Հ. Չ.-ն և Ս. Հ.-ն հոսպիտալացվել են «Սուրբ Գրիգոր Լուսավորիչ ԲԿ», որտեղ բժիշկները տուժածների առողջական վիճակը գնահատել են բավարար: Փրկարարները հոսանքազրկել են ավտոմեքենաները: