Պետական ապարատի աշխատանքի արդյունավետության բարձրացման համար պարտադիր չէ կրճատել աշխատակիցների կամ հաստատությունների թիվը։ Այս մասին դեկտեմբերի 21-ին կայացած կլոր սեղանի ժամանակ հայտարարեց տնտեսական զարգացման եւ ներդրումների նախկին նախարար, ՀՅ Դաշնակցության անդամ Արծվիկ Մինասյանը։ Նրա խոսքերով՝ արդարացի չեն կարծիքներն այն մասին, թե Հայաստանում պետական ապարատի պահպանման ծախսերն ավելի շատ են, քան ուրիշ երկրներում։ «Արդյունավետության բարձրացմանը կարող են նպաստել այնպիսի գործոններ, ինչպիսիք են ժամանակակից տեխնոլոգիաների ներդրումը եւ կադրերի որակավորման բարձրացումը»,- ընդգծեց նա։ «Մինասյանը հավելեց, որ այսօր երկրում զգացվում է այնպիսի կարեւոր ինստիտուտի պակաս, ինչպիսին արհմիություններն են, ինչի հետեւանքով չկա աշխատավորների պաշտպանության համակարգ։ «Այդ ինստիտուտի առկայության դեպքում իշխանությունները չէին կարող առանց արհմիությունների գիտության աշխատավորների իրավունքների եւ պարտականությունների հետ կապված որոշումներ ընդունել։ Դա թույլ կտար խուսափել այնպիսի խնդիրներից, երբ մարդուն հայտարարում են, որ, օրինակ, մարտի 1-ից դու չես աշխատում, ինչն իրականում անօրինական է»,- պարզաբանեց նա։ Նախկին նախարարն ընդգծեց տեղական ինքնակառավարման մարմինների աշխատանքի ապակենտրոնացման կարեւորությունը։ «Անհրաժեշտ է ազատվել իրավիճակից, երբ տեղական ինքնակառավարման մարմիններն անընդհատ նայում են կենտրոնական իշխանությունների «բերանին» եւ վախենում են նախաձեռնություն ցուցաբերել։ Պետք է պայմաններ ստեղծել, որպեսզի մարմինները տեղում շահագրգռված լինեն մարզի զարգացման հարցում»,- ամփոփեց Արծվիկ Մինասյանը։