Միացյալ Նահանգները շնորհավորում է Հայաստանին արտահերթ խորհրդարանական ընտրություններ անցկացնելու կապակցությամբ և կարծում, որ դրանք անցկացվել են ազատ և մրցակցային պայմաններում, հայտարարել է ԱՄՆ Պետդեպարտամենտը:
«Մենք ողջունում ենք ԵԱՀԿ ժողովրդավարական հաստատությունների բյուրոյի և մարդու իրավունքների անվտանգության և համագործակցության կազմակերպության գնահատականներն առ այն, որ Հայաստանում արտահերթ խորհրդարանական ընտրությունները մրցակցային էին, և թեկնածուները հնարավորություն ունեին ազատորեն իրականացնել նախընտրական քարոզարշավը», -ասված է հայտարարության մեջ:
ԱՄՆ Պետդեպարտամենտը նաև նշել է, որ Միացյալ Նահանգները համաձայն է ԵԱՀԿ նախնական եզրակացության հետ, որ Հայաստանում ընտրական գործընթացը լայն հանրային աջակցություն է ստացել, պաշտպանվել են քաղաքացիների հիմնարար ազատությունները:
Բացի այդ, Պետդեպարտամենտը կոչ է արել իշխանություններին հետևել ԵԱՀԿ և Վենետիկի հանձնաժողովի տված խորհուրդներին՝ դրանք ապագա ընտրություններում կիրառելու նպատակով:
Ամերիկյան կողմը Հայաստանի նորընտիր խորհրդարանի և կառավարության հետ աշխատելու, երկկողմ գործընկերությունը խորացնելու, ինչպես նաև օրենքի գերակայության, ժողովրդավարական ինստիտուտների ամրապնդմանն ուղղված համագործակցությունը շարունակելու պատրաստակամություն է հայտնել:
Պետդեպարտամենտը կարևորել է նաև համագործակցությունը կոռուպցիայի դեմ պայքարի, առևտրի և ներդրումների զարգացման, տարածաշրջանային և համաշխարհային անվտանգության ապահովման ոլորտներում:
Ամերիկյան կողմն ընդգծել է, որ «այս տարի Հայաստանում նշանակալի փոփոխություն է տեղի ունեցել»:
«Քսան յոթ տարի Միացյալ Նահանգներն աջակցել է Հայաստանում ժողովրդավարական գործընթացներին, ինստիտուտներին ու մտադիր է նույնկերպ շարունակել»,-ասվում է հայտարարությունում:
00:00:00
