Այն ներդրումները, որ ես Հայաստանում եմ անում, եթե Ռուսաստանում անեի, տասնապատիկ շատ շահույթ կստանայի, սակայն ես սիրում եմ իմ երկիրն ու հպարտանում՝ մեր երկրով: Այս մասին նախընտրական քարոզարշավի շրջանակում ապարանցիների հետ հանդիպմանն ասաց ԲՀԿ առաջնորդ Գագիկ Ծառուկյանը: Ծառուկյանի խոսքով՝ այսօր չլուծվող հարց չկա: Մարդիկ պատրաստ են ներդրումներ անել, բայց դրանց համար հստակ ծրարեր են հարկավոր, ինչը ունի ԲՀԿ-ն: «Մարդուն պետք է հնարավորություն տալ, սովորի, պիտանի մարդ դառնա, հետո թող նրա աշխատավարձից պահեն այն գումարը, որը նա պետք է որպես  ուսման վարձ վճարեր»,-ասաց նա: ԲՀԿ առաջնորդը նշեց, որ երկրի տնտեսական աճը ժողովրդի դեմքից է երևում, նրանց սառնարանների պարունակությունից: Գ. Ծառուկյանի խոսքով՝ մեր երկրի ապագան մեր երիտասարդությունն է, որոնց համար հարակավոր է պայմաններ ստեղծել, որպեսզի մնան ու աշխատեն մեր երկրում, ոչ թե թողնեն հայրենիքն ու հեռանա: