Շաբաթ Հնդկաստանի Ջամա եւ Քաշմիր նահանգում միկրոավտոբուսի վթարի հետեւանքով զոհերի թիվը հասել է մինչեւ 20-ի:
Ավելի վաղ հաղորդվել էր 15 զոհվածի եւ 17 տուժածի մասին:
Ոստիկանությանը վկայակոչելով՝ PTI գործակալությունն ավելի վաղ հայտնել էր, որ միկրոավտոբուսը Ռամբան շրջանից ուղեւորվում էր Բանիհալ քաղաք: Մարուֆ բնակավայրի մոտ վարորդը մեքենայի կառավարումը կորցրել է, եւ միկրոավտոբուսը ընկել է խորը ձորակի մեջ: Դեպքի վայրում շարունակվում է որոնողափրկարարական գործողությունը:
Գերբեռնվածության, ճանապարհների վատ վիճակի եւ վատ վարելու հետեւանքով Հնդկաստանում լուրջ ճանապարհային պատահարներ հաճախ են տեղի ունենում: Պաշտոնական վիճակագրությամբ՝ երկրում ամեն օր վթարների հետեւանքով զոհվում է 400 մարդ, տարեկան ճանապարհային պատահարների զոհ է դառնում գրեթե 150 հազար մարդ: Առողջապահության համաշխարհային կազմակերպության տվյալներով՝ հնդկական ճանապարհներին տարեկան մահացությունը վերջին տարիներին գերազանցում է 200 հազար մարդ ցուցանիշը:
