Համացանցում հրապարակվել է Սոչիի օդանավակայանում վայրէջքի պահին թռիչքուղուց դուրս եկած Boeing 737 օդանավի անձնակազմի և ավիակարգավարի բանակցությունների ձայնագրությունը: Ինչպես հայտնում է Lenta.ru-ն, Utair ավիաընկերության օդանավի իջնելու ժամանակ ավիակարգավարն օդաչուին առաջարկում է երկրորդ շրջան կատարել: «Փորձենք ևս մեկ անգամ մտնել 06 թռիչքուղի», - ասում է օդաչուն՝ կրկին ճշտելով, թե արդյոք եղանակային պայմանները հարմար են վայրէջքի համար: «Եղանակային պայմանները համապատասխան են», - պատասխանում է ավիակարգավարը: Վայրէջքից հետո օդաչուն ավիակարգավարներին տեղեկացրել է օդանավում բռնկված հրդեհի մասին: Հիշեցնենք, որ այսօր ավելի վաղ Մոսկվայից Սոչի ժամանած ուղևորատար ինքնաթիռը վթարային վայրէջք կատարելուն պես սկսել է այրվել: Օդանավում գտնվող 164 ուղևորին և անձնակազմի 6 անդամին տարհանել են: 18 մարդ վիրավորվել է: Օդանավակայանի աշխատակիցներից մեկը, որն օգնելիս է եղել տարհանման իրականացմանը, սրտի կաթված է ստացել: Տեսանյութը՝ այստեղ։