Երեկ՝ օգոստոսի 25-ին, մահվան ելքով վրաերթ է տեղի ունեցել Արմավիրի մարզում։ Ժամը 22։30-ի սահմաններում Զվարթնոց թաղամասի բնակիչ՝ 33-ամյա Վահե Մղդսյանը իր վարած BMW մակնիշի 35 KC 840 համարանիշի ավտոմեքենայով Էջմիածին քաղաքի Մաշտոցի փողոցի թիվ 22 շենքի դիմաց վրաերթի է ենթարկել հետիոտներ՝ Էջմիածին քաղաքի Մեխակյան փողոցի բնակիչներ, 71-ամյա Էտերիա Կարապետյանին և 39-ամյա Ալինա Նազարյանին։
Ինչպես հայտնում է shamshyan.com-ը, վարորդը փախուստի չի դիմել, օգնել է, որպեսզի վրաերթի ենթարկվածներից Է. Կարապետյանը տեղափոխվի Վաղարշապատի բժշկական կենտրոն, իսկ Ա. Նազարյանն արդեն մահացած վիճակում տեղափոխվել է նույն բժշկական կենտրոն։
Դեպի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի ծառայողները և ոստիկանության Վաղարշապատի բաժնի օպերատիվ խումբը՝ բաժնի պետ Գևորգ Հակոբյանի գլխավորությամբ։
Վրաերթի մասին ՃՈ 1-77 օպերատիվ կառավարման կենտրոնի պատասխանատու հերթապահ Յուրա Հովհաննիսյանը տեղեկությունը փոխանցել է Հայաստանի քննչական կոմիտեի Արմավիրի մարզային քննչական վարչություն, որտեղից ժամանել է քննչական խումբը՝ քննիչ Պողոսյանի գլխավորությամբ, ում կողմից փաստի առթիվ հարուցվել է քրեական գործ՝ ՀՀ քր. օր-ի 242 հոդվածի 2-րդ մասի հատկանիշներով։
Ֆոտոլրագրողը հայտնում է նաև, որ վրաերթի պատճառը եղել է այն, որ մի քանի մոտոցիկլներ մի քանի ժամ շարունակ նշված փողոցում «թրև են եկել», իսկ հետո վթարային իրավիճակ են ստեղծել BMW-ի վարորդի համար, ինչն էլ դարձել է ողբերգական վրաերթի պատճառ։
Վաղարշապատի բնակիչները SHAMSHYAN.com-ի թղթակցի հետ զրույցում ասում էին. «Եթե ճանապարհային ոստիկանությունն ու Էջմիածնի ոստիկանները ժամանակին քաղաքում բնակիչների անդորրը խախտող այդ մոտովարողներին հայտնաբերեին ու կարգի բերեին, ապա այս ողբերգական դեպքը տեղի չէր ունենա, մինչդեռ մի քանի օր է՝ Էջմիածնի փողոցները որոշ մարդկանց համար վերածվել է մրցավազքի. ով ոնց ուզում՝ վարում է մեքենան, անգամ ճանապարհային ոստիկանների առաջ, իսկ նրանք կամ չտեսնելու են տալիս որոշ վայ-վարորդների օրինախախտումները, կամ էլ միտումնավոր չեն սանձում այդ գիշերային չղջիկներին, ովքեր երրբեմն կեսգիշերն անց դժոխային արագությամբ զվռնում են փողոցներում, իսկ ճանապարհային ոստիկաններն ու Էջմիածնի ոստիկանության գիշերային հերթափոխի ծառայողները քար անտարբերություն են ցուցաբերում։
SHAMSHYAN.com
