ՀՀ տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանն ընդունել է Հայաստանում Վրաստանի արտակարգ եւ լիազոր դեսպան Գիորգի Սագանելիձեին։ Նախարարությունից հայտնում են, որ ողջունելով հյուրին` նախարարը բարձր է գնահատել երկու երկրների միջեւ համագործակցության ամուր հիմքերը։ Հանդիպմանն անդրադարձ եղավ երկկողմ հետաքրքրություն ներկայացնող տարածաշրջանային խնդիրներին: Կողմերը քննարկեցին Բագրատաշենի կամրջի շինարարության ծրագրին վերաբերող մանրամասներ։ Նախարարն ու դեսպանը զրուցեցին նաեւ երկաթուղային փոխադրումներին առնչվող հարցերի շուրջ, մասնավորապես, Երեւան-Բաթումի-Երեւան երթուղին առավել բարեկարգ շարժակազմով սպասարկելու հնարավորությունների մասին։ Հանդիպման ընթացքում կողմերն անդրադարձել են նաեւ Լարսի ավտոճանապարհին, բեռնափոխադրումներին եւ ուղեւորափոխադրումներին առնչվող մի շարք խնդիրների։