Ճապոնիայում ուժեղ անձրևների հետևանքով զոհերի թիվը հասել է 35-ի: Ինչպես հաղորդում է INTERFAX.RU-ն՝ հղում անելով ճապոնական հեռուստաընկերությանը, ևս 47 մարդ անհետ կորած է համարվում:
Հորդառատ անձրևները սողանքների և ջրհեղեղի պատճառ են դարձել Կիոտո, Օկայամա, Հիրոսիմա նահանգներում, ինչը բարդացնում է որոնողա-փրկարարական աշխատանքների ընթացքը:
Իշխանություններն արդեն հրահանգել են ավելի քան 1.6 մլն մարդու տարհանել աղետի գոտուց, որն ընկած է հիմնականում երկրի արևմտյան հատվածում:
Փրկարարական աշխատանքներին ներգրավվել են 48 000 հրշեջ փրկարար, ոստիկան և զինվորական: Ճապոնիայի վարչապետ Սինձո Աբեն իրավիճակն անվանել է «ծայրահեղ լուրջ»:
Ճապոնիայի օդերևութաբանական գործակալությունը վտանգի մակարդակը մի շարք շրջաններում հասցրել է բարձրագույնի, ինչը նշանակում է, որ տարածաշրջանում կարող են գրանցվել տասնամյակների ընթացքում տեղացած ամենաուժեղ անձրևները:
Ավելի վաղ հաղորդվում էր 19 նահանգներից 3 մլն մարդու տարհանման մասին:
