Թուրքիայի նախագահ Ռեջեփ Թայիփ Էրդողանն ընդունել է ՆԱՏՕ-ի գլխավոր քարտուղար Մարկ Ռյուտեին, որն Անկարա է ժամանել դաշինքի գագաթնաժողովին մասնակցելու համար, հաղորդում են թուրքական լրատվամիջոցները։
Բանակցությունների ընթացքում կողմերը քննարկել են Անկարայում անցկացվելիք ՆԱՏՕ-ի գագաթնաժողովի օրակարգը, ինչպես նաև տարածաշրջանային և համաշխարհային զարգացումները։
Էրդողանը հայտարարել է, որ ՆԱՏՕ-ի գագաթնաժողովի անցկացման ուղղությամբ Թուրքիայի նախապատրաստական աշխատանքներն ամբողջությամբ ավարտված են։ Նա նաև հույս է հայտնել, որ հանդիպումը դրական արդյունքներ կբերի։
Թուրքիայի նախագահը նշել է, որ գագաթնաժողովում կարևոր է քննարկել հարցերի լայն շրջանակ՝ հավաքական պաշտպանությունից մինչև դաշնակիցների միջև պաշտպանական արդյունաբերության ոլորտում համագործակցության ընդլայնումը։
Ըստ Էրդողանի՝ Պաշտպանական արդյունաբերության ֆորումը, որը կանցկացվի գագաթնաժողովի շրջանակում, ևս լինելու է ուշադրության կենտրոնում։
