Այսօր վաղ առավոտյան ԱՄՆ իրավապահ մարմինները ձերբակալել են մի տղամարդու, որը կասկածվում է Օհայո նահանգի Ցինցինատի քաղաքում գտնվող՝ ԱՄՆ փոխնախագահ Ջեյ Դի Վենսի անձնական նստավայրի վրա հարձակում գործելու մեջ, տեղեկացնում է CNN-ը:
Նշվում է, որ միջադեպը տեղի է ունեցել կեսգիշերից անմիջապես հետո, երբ անհայտ անձը մուրճով կոտրել է տան մի քանի պատուհաններ և փորձել ներթափանցել շինություն։ Բացի այդ, հարձակվողը վնասել է նաև տան մոտ կայանված Գաղտնի ծառայության մեքենաներից մեկը։
Միջադեպի պահին Ջեյ Դի Վենսն ու նրա ընտանիքի անդամները տանը չեն եղել։ Գաղտնի ծառայության գործակալները, որոնք հսկում էին տարածքը, նկատել են կասկածյալին և կարողացել են բերման ենթարկել նրան նախքան տուն մուտք գործելը։
Ինչպես հաղորդվում է՝ իրավապահներն այժմ հետաքննում են՝ արդյոք հարձակումը հատուկ թիրախավորվա՞ծ է եղել փոխնախագահի ընտանիքի դեմ, թե՞ ունեցել է այլ դրդապատճառներ։
Սպիտակ տունը և փոխնախագահի գրասենյակը դեռ պաշտոնապես չեն մեկնաբանել այս տեղեկությունը:
