Մենք Վաղարշապատի ընտրությունների քարոզարշավը մեկնարկել ենք օրենքով սահմանված ժամկետներում, օրենքով սահմանված կարգով, մի օր առաջվա միջոցառումը քարոզչական բնույթի չի եղել, այն ամենամյա միջոցառում է և դրան ներկա են եղել տարբեր ուժերի ներկայացուցիչներ, լրագրողների հետ զրույցում ասաց ՏԿԵ նախարար Դավիթ Խուդաթյանը։
Նրա խոսքով՝ միջոցառման ժամանակ քաղաքական կոչեր, ընտրություների հետ կապված ոչ մի հարց չի քննարկվել.«Եղել է համայնքային միջոցառում, որին մասնակցել է համայնքի ղեկավարը և Արմավիրի մարզպետը»։
Իսկ ինչ վերաբերում է ընտրական հանձնաժողովների անդամների մասնակցությանը քարոզարշավին՝ Խուդաթյանը նշեց, որ խոսքը միայն ֆեյսբուքյան հրապարակումներով կիսվելուն է վերաբերում.
«Ենթադրաբար, «Հետքի» հոդվածի մասով եք հարցնում, պետք է իմ տարակուսանքը հայտնեմ «Հետքի» իմ գործընկերներին, քանի որ նույն բանն արձանագրել են նաև այլ քաղաքական ուժերի մոտ։ Առնվազն քարոզչական այս փուլում արդար չէ այդ հոդվածը պարբերաբար հրապարակելը՝ Արգիշտի Մեխակյանի նկարով»։
