Ռուսաստանը շարունակում է կարևոր գործընկեր մնալ Հայաստանի համար: Այս մասին այսօր մշտական խորհրդարանական հանձնաժողովների համատեղ նիստում՝ 2026 թվականի պետական բյուջեի նախագծի քննարկման ժամանակ ասել է ՀՀ արտաքին գործնախարար Արարատ Միրզոյանը։
Նրա խոսքով՝ Ռուսաստանի հետ տնտեսական կապերը շարունակում են հետաքրքրություն ներկայացնել պաշտոնական Երևանի համար։
«Այս համագործակցության շրջանակում մենք մեր ռուս գործընկերների հետ քննարկում ենք հայ փոխադրողների միգրացիոն խնդիրները։ Մոտ ապագայում դրական տեղաշարժեր ենք ակնկալում»,- ասել է Միրզոյանը։
Նա անդրադարձել է նաև ԱՊՀ և ԵԱՏՄ անդամ պետությունների հետ Հայաստանի հարաբերություններին։ Մասնավորապես, Միրզոյանն ընդգծել է, որ երկու կառույցների շրջանակում համագործակցությունը չափազանց ինտենսիվ է զարգանում։ Նա հատկապես ընդգծել է ԵԱՏՄ-ի հետ համագործակցության, մասնավորապես՝ Չինաստանի, Իրանի, Ինդոնեզիայի և այլ երկրների, ինչպես նաև Միության անդամ պետությունների միջև գործընկերության կարևորությունը։
Այդ համատեքստում նախարարը նշել է, որ տրանսպորտային կապերի ապաշրջափակումից, մասնավորապես՝ Ադրբեջանի տարածքով ապրանքների տարանցման սահմանափակումների վերացումից հետո, Հայաստանի նկատմամբ հետաքրքրությունն աճել է։ Մասնավորապես, Ղազախստանի հետ լուրջ երկխոսություն է ընթանում։ Ավելին, պատրաստվում է Հայաստանի վարչապետ Նիկոլ Փաշինյանի այցն այդ երկիր։
Դիվանագետը համոզված է, որ ղազախական հացահատիկը, որի մատակարարումների մասին ազդարարել են Երևանն ու Բաքուն, շուտով կհասնի Հայաստան։
«Ներկայում ինտենսիվ քննարկումներ են ընթանում Ուզբեկստանի և Թուրքմենստանի հետ։ Դա վերաբերում է լոգիստիկ և էներգետիկական հարցերին, ավիափոխադրումների վերսկսմանը և այլն»,- հայտնել է կառավարության ներկայացուցիչը։
