Ֆրանսիայի արտաքին գործերի նախարար Ժան-Նոել Բարրոն BBC-ին տված հարցազրույցում հայտարարել է, որ Կիևը իրավունք ունի ֆրանսիական հեռահար հրթիռներ արձակել Ռուսաստանի տարածք, փոխանցում է «Գազետա»-ն։
Դիվանագետի խոսքով՝ Կիևը կարող է նման հարվածներ հասցնել «ինքնապաշտպանության նպատակով»։ Նա նաև կարծիք է հայտնել, որ Արևմուտքը չպետք է սահմանափակումներ և «կարմիր գծեր» ունենա Ուկրաինային աջակցելու հարցում։
Բարրոն նշել է, որ եվրոպական անվտանգությունը կախված է Կիևին ցուցաբերվող օգնությունից։
«Ամեն անգամ, երբ ռուսական բանակը մեկ քառակուսի կիլոմետր առաջ է շարժվում, սպառնալիքը մեկ քառակուսի կիլոմետրով մոտենում է Եվրոպային»,- ասել է նախարարը։
Նա, սակայն, չի հաստատել, որ ֆրանսիական հրթիռները օգտագործվել են ռուսական տարածքի վրա հարձակվելու համար։ Հարցին, թե արդյոք Ֆրանսիան կարող է իր զորքերը ուղարկել ուկրաինական հակամարտության գոտի, դիվանագետը պատասխանել է, որ Փարիզը չի բացառում որևէ տարբերակ։
