Ազատ գյուղի զինվորական կացարանում հրդեհի հետևանքով զոհված 15 զինծառայողների ծնողները վաղը կհանդիպեն ՀՀ զինվորական դատախազի հետ։
Լրագրողների հետ հանդիպմանը փաստաբան Նորայր Նորիկյանը հայտարարեց, որ, այս պահի դրությամբ, ստացվել են զոհված 15 զինծառայողներից 10-ի դատաբժշկական փորձաքննության եզրակացությունները, զոհված մյուս 5 զինծառայողների ծնոնղների հարցաքննությունը կլինի առաջիկայում։
«Փետրվարի 9-ին իմ կողմից դիմումներ են ներկայացվել ՀՀ պաշտպանության նախարարին ու ՀՀ զինվորական դատախազին՝ հանդիպելու ծնողների հետ, փետրվարի 28-ին էլ ծնողներն են անհատապես դիմում ներկայացրել Պաշտպանության նախարարին՝ հանդիպման պահանջով։ Մեզ համար տարակուսելի է Պաշտանության նախարարության ղեկավարության պահվածքը. ոչ միայն ձեռնպահ մնացին հանդիպել տուժողներին, այլ նաև իրենց վարքագծով առնվազն ներողություն խնդրելու առումով պարտավոր էին որոշակի հրապարակայնություն դրսևորել, սա ասում եմ նվազագույնը՝ ինչ կարող էին անել, իսկ զինվորական դատախազի հետ հանդիպումը տեղի կունենա վաղը»,- նշեց Նորիկյանը։
Նա նշեց, որ մարտի 21-ին միջնորդություն են ներկայացրել վարույթն իրականացնող մարմնին հարցաքննել զոհված զինծառայողներից մեկի ծնողին ու լրացուցիչ երկու այլ քաղաքացիների, որոնց կողմից տրված բացատրությունը հրդեհի պահի ու այդ տարածքում գտնվող ողջ մնացած զինվորներից մեկի վարքագծի վերաբերյալ որոշակի հակասող կամ էապես տարբերվող փաստական տվյալներ են պարունակում, իսկ մարտի 27-ին միջնորդել են հարցաքննել երկու անձանց, որոնք հրապարակայնորեն փաստական տվյալներ ու առերևույթ պնդումներ են իրականացրել այն մասին, որ հունվարի 19-ին տեղի ունեցած ողբերգությունը դիվերսիա է, որը տեղի է ունեցել ադրբեջանական ԶՈՒ-ի կողմից։
