44-օրյա պատերազմում զոհվածների ծնողները ուղերձ են հղել Եռաբլուրից։ Նրանք բացատրել են, որ ուղերձ հղելու որոշում են կայացրել այն բանից հետո, երբ իմացել են, որ Ադրբեջանի ռազմական գործողությունների հետևանքով զոհվածներից մեկի հայրը, իմանալով որդու զոհվելու մասին, ինքնասպան է եղել։

Զոհվածների ծնողները նշեցին, որ հասկանում են այդ մարդկանց ցավը, քանի որ իրենք նույնպես անցել են այդ ճանապարհով։

«Ցավոք չի ավարտվել պատերազմը դեռ։ Մեկ անգամ ևս կոչ եմ անում բոլոր ծնողներին՝ եկե՛ք համախմբվենք, որ հերթական զոհ չունենանք»,– ասաց զոհված զինծառայողների ծնողներից մեկը։ 

Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈՒ ստորաբաժանումները Գորիսի, Կապանի, Սոթքի, Ջերմուկի, Արտանիշի եւ Իշխանասարի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաեւ ԱԹՍ-ներ: Հակառակորդը հարվածում է թե՛ ռազմական, թե՛ քաղաքացիական օբյեկտներին, որոշ ուղղություններով ձեռնարկում դիրքային առաջխաղացման գործողություններ։ Հայկական կողմն ունի 49 զոհ և 43 վիրավոր, վիրավորներից երեքը քաղաքացիական անձինք են։