Ազգային ժողովի նախագահ Ալեն Սիմոնյանը շարունակում է պնդել՝ ընդդիմադիր պատգամավորները պետք է զրկվեն մանդատներից:
Ըստ նրա՝ «Քաղաքացիական պայմանագիր» խմբակցությունում այս թեմայով տարբեր դիրքորոշումներ կան:
«Պետք է նստաշրջանն ավարտվի, դրա մասին մենք կարող ենք խոսել դեկտեմբերին: Ես վստահ եմ, որ իրենք փորձելու են ինչ-որ ձևով կա՛մ բժշկի թուղթ ներկայացնել, կա՛մ ինչ-որ ձևով գալ ու մասնակցություն ապահովել, իբր, իրենց օրակարգով, դա էլ պարզ չէ, թե ինչ է նշանակում: Տարվա վերջում, ըստ տվյալների, հարցը կմտնի խորհուրդ ու որոշում կկայացվի», - Ազգային ժողովում լրագրողների հետ զրույցում ասաց ԱԺ նախագահը:
Նա նշեց, թե ՔՊ-ում կարծիք է եղել, որ պետք է ընդդիմադիրներին հնարավորություն տալ վերադառնալու, բայց ինքը դեմ է եղել:
«Ես տրամադրված եմ այնպես, որ որևիցե քաղաքական գործիչ չպետք է աշխատավարձ ստանա, օգնականները չպետք է աշխատավարձ ստանան, եթե գործի չեն գալիս: Վստահ եմ՝ հաջորդ անգամ մեր խմբակցությունը ավելի խիստ վերաբերմունք կդրսևորի», - ասաց Սիմոնյանը:
Այլ մանրամասներ՝ տեսանյութում։
