Կառավարության անդամների հետ ճեպազրույցի ժամանակ լրագրողները Կադաստրի կոմիտեի ղեկավար Սուրեն Թովմասյանին հարց ուղղեցին պետական սահմանների մասին օրենքում որևէ փոփոխություն չանելու և բանավոր փոխըմբռնման պայմաններում թշնամուն Սյունիքից տարածքներ զիջելու վերաբերյալ, ինչին ի պատասխան Թովմասյանը ասաց․
«Չեմ հիշում նման բան, որովհետև նման բան տեղի չի ունեցել։ Որպես մասնագետ խորհուրդ կտամ բոլորիս փորձել մնալ այն դաշտում, որը որևէ խնդիր չի առաջացնելու ՀՀ-ի համար։ Այս մասով կա հանձնաժողով, որը իր աշխատանքները իրականացնում է շատ ակտիվ»։
Հարցին՝ որպես Կադաստրի կոմիտեի ղեկավար, ունի՞ իր ձեռքի տակ ամբողջ ՀՀ-ի քարտեզը և ո՞ր քարտեզների հիման վրա են բանակցում Ադրբեջանի հետ, Թովմասյանը ասաց․ «Մենք ունենք ամբողջ ՀՀ-ի կադաստրային քարտեզները, իսկ թե ինչ քարտեզների հիման վրա են իրականցվում բանակցությունները, դա գտնվում է ոչ թե Կադաստրի կոմիտեի լիազորությունների, այլ իրավական հարցերի շրջանակներում։ Ցանկացած խնդիր պետք է լուծում ստանա բացառապես իրավական հիմքերի վրա։ Այն քարտեզները, որոնք կունենան իրավական հիմքեր, Կադաստրի կոմիտեն դրանց հիման վրա կստանա համապատասխան հանձնարարականներ և կկատարի համապատասխան աշխատանքներ»։
