Ռուսական նավերը կրակ են բացել բեռնանավի վրա, որն ուղեւորվում էր Մարիուպոլ՝ «Ազով» գումարտակի ղեկավարությանը տարհանելու համար
Ռուսական նավերն ապրիլի 8-ին կրակ են բացել ուկրաինական «Ապաչի» բեռնանավի վրա, որը փորձել է մտնել Մարիուպոլի նավահանգիստ՝ «Ազով» գումարտակի ղեկավարությանը տարհանելու համար, հայտնել է ՌԴ ՊՆ ներկայացուցիչ Իգոր Կոնաշենկովը, փոխանցում է «Ինտերֆաքսը»։
Բեռնանավը, որը նավարկել է Մալթայի դրոշի ներքո, չի արձագանքել նախազգուշացումներին, ռուսական սահմանային նավերը եւ ՌԴ Սեւծովյան նավատորմի նավը կրակ են բացել նրա վրա, ասել է Կոնաշենկովը։
«Հրդեհի հետեւանքով նավի անձնակազմի անդամներից տուժածներ չկան։ Նավի անձնակազմն ինքնուրույն մարել է կրակը։ Ստուգումից հետո ուկրաինական «Ապաչի» բեռնանավը անձնակազմով տեղափոխվում է Յեյսկ նավահանգիստ»,- ասել է Կոնաշենկովը։
Նրա խոսքով՝ Ուկրաինայի իշխանությունները, «Ազով»-ի ղեկավարությանը ուղղաթիռներով տարհանելու անհաջող փորձերից հետո, ապրիլի 8-ին որոշել են ծովից տարհանման փորձ իրականացնել։
Բացի այդ, Կոնաշենկովը նշել է, որ այս նավը պետք է նաեւ օտարերկրյա վարձկաններին տարհաներ Մարիուպոլից։
Կոնաշենկովն ասել է, որ դեպի Մարիուպոլի նավահանգիստ շարժման ժամանակ նավը ռադիոփոխանակում է իրականացրել, ափին ազդանշանային կրակներ են նկատվել։
Նրա խոսքով, ուղիղ հարվածի հետեւանքով նավի հետնամասում հրդեհ է բռնկվել։
«Դրանից հետո ուկրաինական բեռնանավը կանգ է առել, անձնակազմը կապ է հաստատել սահմանային նավերի հետ, խնդրել է դադարեցնել կրակը եւ հաստատել է ռուս նավաստիների բոլոր պահանջները կատարելու իրենց պատրաստակամությունը»,- ասել է Կոնաշենկովը։
