Ղազախստանի առաջին նախագահ Նուրսուլթան Նազարբաեւը բանակցություններ է վարել Թուրքիայի նախագահ Ռեջեփ Թայիփ Էրդողանի հետ Անթալյայում Դիվանագիտական ֆորումի շրջանակում:
Նազարբաեւի մամուլի ծառայության հաղորդմամբ՝ նա իր երախտիքն է հայտնել Էրդողանին միջազգային ֆորումին հրավիրելու համար՝ ընդգծելով ներկայիս համաշխարհային աշխարհաքաղաքական փոփոխությունների համատեքստում այդ միջոցառման կարեւորությունը:
Իր հերթին Էրդողանն ընդգծել է Նազարբաեւի կարեւոր ներդրումը թուրք-ղազախական հարաբերությունների զարգացման եւ կայացման գործում: Թուրքիայի նախագահը նաեւ բարձր է գնահատել Ղազախստանի առաջին նախագահի գործունեությունը թյուրքական աշխարհի երկրների ինտեգրացիոն գործընթացներն ընդլայնելու եւ խորացնելու հարցում:
Հանդիպման ընթացքում կողմերը կարծիքներ են փոխանակել միջազգային օրակարգի արդիական հարցերի շուրջ՝ ընդգծելով Ուկրաինայում ռազմական հակամարտության կարգավորման գործում դիվանագիտության եւ միջպետական երկխոսությունը վերականգնելու միջոցով ձեռնարկվող ջանքերի կարեւորությունը:
