Կառավարությունը փետրվարի 3-ի նիստում որոշեց 2022 թվականի փետրվարի 16-ից մինչև դեկտեմբերի 31-ը Գոհար Սիմոնյանին գործուղել Եվրոպայի խորհրդի մարդու իրավունքների եվրոպական դատարանի վճիռների կատարման վարչություն: «ԵԽ քարտուղարության վճիռների կատարման վարչությունում իրավաբանի առկայությունը թույլ է տալիս Հայաստանի վերաբերյալ վճիռներին առնչվող հարցերում ժամանակին և պատշաճ աշխատանքներ իրականացնել վճիռների կատարման ընթացքում, ինչպես նաև ԵԽ Նախարարների կոմիտեին տրամադրել ակնկալվող տեղեկատվությունը, ինչը բազմիցս օգտակար է եղել ՀՀ արդարադատության նախարարությանը, ՄԻԵԴ-ում ՀՀ ներկայացուցչին և ԵԽ-ում ՀՀ մշտական ներկայացուցչությանը»,-նշվում է որոշման հիմնավորման մեջ։ Նույն այդ հիմնավորման համաձայն՝ համակարգում իրավաբանի ներկայությունն արդյունավետ է նաև կատարման առումով բարդություն ներկայացնող վճիռների իրականացման ընթացքում երկկողմ հաղորդակցություն ապահովելու, ինչպես նաև անհրաժեշտության դեպքում հրատապ խորհրդակցություններ և բանակցություններ նախաձեռնելու և կազմակերպելու հարցում։ «ԵԽ քարտուղարությունը դիմել է ՀՀ մշտական ներկայացուցչություն՝ առաջարկելով ՄԻԵԴ վճիռների կատարման վարչություն գործուղված Գոհար Սիմոնյանի գործուղման ժամկետը մինչև 2022 թ. դեկտեմբերի 31-ը։ ՀՀ մշտական ներկայացուցչությունը նպատակահարմար է գտել երկարաձգել Գոհար Սիմոնյանի գործուղման ժամկետը։ Գոհար Սիմոնյանի գործուղման ֆինանսավորումը կիրականացվի ՀՀ բյուջեով նախատեսված «Օտարերկրյա պետություններում ՀՀ դիվանագիտական ծառայության մարմինների գործունեության կազմակերպում և իրականացում» ծրագրի շրջանակներում հատկացված միջոցների հաշվին»,-նշվում է հիմնավորման մեջ։