Բաքվի բռնապետը հաճախ էր խոսում իր «փայլուն» արտաքին քաղաքականության համատեքստում Իրանի հետ բարելավված հարաբերությունների մասին։ Այս մասին Facebook-ի իր էջում գրել է «Հայրենիք» կուսակցության անդամ, իրանագետ Վարդան Ոսկանյանը: Նա, մասնավորապես, նշել է. «Վերջին մի քանի օրերի ընթացքում Թեհրան-Բաքու հարաբերություններում լարումը հասել է գրեթե պատմական բարձրակետին և շատ մոտ է անդառնալիության կետն անցնելուն։ Հետևաբար, կարելի է արձանագրել, որ «փայլուն» քաղաքականության բոլոր ձեռքբերումներն իրանական ուղղությամբ այս պահին առ ոչինչ են դարձել։ Եթե սրան գումարենք կոռուպցիոն բացահայտումների հետևանքով Բաքվի բռնապետին հասցված նոր միջազգային հարվածը, ապա առերևույթ հոխորտացող այս անձի դիրքերը թե՛ միջազգային ասպարեզում և թե՛ իր երկրի ներսում նկատելիորեն սասանվել են»։