Նկատի ունենալով, որ ռազմական գործողությունների վերսկսման թեման ամենատարբեր ռակուրսներից քննարկման տիրույթում է, «Հենակետ» կենտրոնի ղեկավար Տիգրան Աբրահամյանը մի քանի դիտարկում է արել։ «Միանգամից ասեմ, որ կարճաժամկետ կտրվածքով դրա հավանականությունը բացառում եմ։ Միջնաժամկետ կտրվածքով, ռիսկերը որոշակի կաճեն, սակայն այդ ժամանակային փուլում պատերազմի վերսկսման հավանականությունը բարձր չեմ համարում։ Երկարաժամկետ կտրվածքով, մեծ թվով գործոններ կան, որոնք կարող են էականորեն մեծացնել պատերազմի հավանականությունը։ Կարճաժամկետ և միջնաժամկետ կտրվածքում պատերազմ չկանխատեսելու գլխավոր պատճառը ռուսական զորախմբի ներկայությունն է Արցախում, նաև ընդլայնումը՝ Հայաստանի սահմանին։ 2008 թվականին Աբխազիայում, Հարավային Օսեթիայում արդեն տեսել ենք, թե ինչ է լինում, երբ ռուսական խաղաղապահների տեղակայման պայմաններում ուժի կիրառման փորձեր է լինում։ Այս հաշվարկներում իրավիճակ կարող է փոխվել, եթե կտրուկ շրջադարձեր լինեն ՌԴ-ի ներսում, մեր տարածաշրջանում։ Ասածս որևէ ձևով չի բացառում սահմանային սադրանքներն ու լարվածությունը, ավելին՝ դրանց ակտիվացումը լրացուցիչ վերլուծության առարկա է», - ֆեյսբուքյան էջում գրել է փորձագետը: