Ազատության հրապարակում մեկնարկել է ընդդիմադիր կուսակցությունների նախաձեռնած հանրահավաքը՝ վարչապետ Նիկոլ Փաշինյանի հրաժարականի պահանջով։ Հավաքի մասնակիցները «հող հանձնողներ», «դավաճաններից մեկը» գրություններով բերել են «Իմ քայլը» խմբակցության պատգամավորների նկարները, դասավորել Ազատության հրապարակի աստիճաններին։ Ոստիկանությունն ուժեղացված հսկողություն է իրականացնում տարածքում, հորդորում քաղաքացիներին դադարեցնել հավաքը, քանի որ երկրում հայտարարված է ռազմական դրություն։ Նախկին վարչապետ Հրանտ Բագրատյանը անդրադարձավ հարցին, թե արդյո՞ք հնարավոր է փոխել եռակողմ համաձայնագիրը․ «Համարյա 90 տոկոսով ռուսական խաղաղապահները տեղակայվել են, բայց մի բան կարելի է անել այդ փաստաթղթի հետ, Նիկոլ Փաշինյանը այդ չի անի»։ Բագրատյանը հիշեցրեց՝ անօդաչու թռչող սարքերի, Բայրաքթարների վտանգի մասին խոսել է հունվարին, ապա նաև մարտի 5-ին։ Հիշեցնենք՝ մարտի 5-ին «Ա1+»-ի հետ զրույցում նա ասել էր՝ թուրքական դրոնները վաղը գալու են Արցախի վրա, պետք է դրոնային հրետանի ունենալ։ Բագրատյանը համոզված է՝ համաձայնագրի որոշ կետեր հնարավոր է փոխել, իսկ օրինակ Քարվաճառի մասով որոշ կետեր կարող ենք չկատարել։ Նշենք, որ հավաքվածներին միացան ազատամարտիկներ, որոնց ծափահարություններով դիմավորեցին։