Ուրուգվայցի հարձակվող Լուիս Սուարեսը «Բարսելոնայի» մարզաբազայում հրաժեշտ է տվել կատալոնական թիմի ֆուտբոլիստներին, հաղորդում է AS-ը։ Սպասվում է, որ 33-ամյա ֆուտբոլիստը կարիերան կշարունակի Մադրիդի «Աթլետիկոյում»։ Լուիս Սուարեսի պայմանագիրը «Բարսելոնայի» հետ նախատեսված է մինչեւ 2021թ․ հունիս։ Նա ստանում է տարեկան 14 միլիոն եվրո։ Ակումբը պայմանագրի վաղաժամ միակողմանի խզման համար առաջարկում է 7 միլիոն եվրո, Սուարեսը պահանջում է ամբողջ գումարը։ Անցած մրցաշրջանում Լուիս Սուարեսը «Բարսելոնայի» հետ մասնակցել է 36 հանդիպման, խփել 21 գոլ, կատարել 10 գոլային փոխանցում։ Լուիս Սուարեսը «Բարսելոնա» էր տեղափոխվել 2014-ին անգլիական «Լիվերպուլից»։